Amawii & Asha Duet Exibition of Art ni nga chhung awh tur vawiin khan  Art Novelty Chaltlang ah Pi Vanlalawmpuii Chawngthu, MLA, Chairperson, Mizoram State Commission for Women in a hawng.

Tawngkama sawifiah zawh loh  ngaihtuahna chhungril ber  tarlang  theitu  lemziak leh thiam thil danga sulhnu nei tha tak Mizo hmeichhia ngei Pi Amoi’n (Pi Lalhmingmawii) hetiang tarlanna Exhibition a buatsaih thin chu a ropuiin a chhuanawm a tih thu khuallian Pi Vanlalawmpuii  chuan sawiin  pasal fanau enkawl chung leh  kalkawng thui leh bumboh  tak te pawh  lo paltlang   chunga  hetiang  kutchhuak rotling leh  tha tak tak  a sual chhuahna ah entawntlak a  ti in, Mizo hmeichhia te talent that zia leh nep  bik loh zia tarlangtu a ni, a ti a. Hmalak zel na tur kawngah leh Arts lam hmasawnna turah Sorkar  lam atanga  puih theihna turah chuan tlanchhe lova puihzel a inhuam thu a sawi bawk..

In phurpui tawnna  te, hmeichhia leh hmeichhia  intawiawma in chawimawi tawn te a pawimawh thu sawiin  Pi Vanlalawmpuii chuan  hnamdang te kutchhuak,  a bikin vun ngo te  thiam zawk leh tha zawka  ngaih tur an ni lova. Keimahni ngei hi kan thiam in kan thei ve a ni tih hria a, pawm a tul thu leh  hmasawn zel erawh chu  tum tur a niin  kan kutchhuak  te in hlut sak a pawimawh a ni a ti a.  Ni nga chhung vawiin ni 21 atanga ni 25th March thleng awh tur Amoii & Asha Duet Exibition of Art chu  a duh apiang  ten  en a an lei theih nan  leh  Arts lamah Mizo ten hma an sawn zel theih nana duhsakna nen a hawng a ni.

Khualzahawm Pi Lallianpuii, MIS Jt.Director, I & PR pawhin thu sawiin Art hian  richhuak miah lovin ril takin thu a sawi a, chutiang chi hrang  hrang  lantirna Mizo Nu ngeiin  a luhchilh leh Solo Exibition te pawh ram pawn lam thlenga lo phochhuak fo tawh Pi Amoii chu a tumruhna leh taimakna fakawm in entawntlak a tih thu a sawi a. Thalai leh thangtharte pawh hian hetiang painting leh sculpture (Ker mawi) te hi rawn uar zel se, tih tur neih mumal  loh vanga nunkawng zawh sual  te pawh hi a kiam phah ngei a beisei thu a sawi bawk.

Pu Laltanpuia, President, MADS kaihhruai vawiin  programme ah hian  Pi Amoii pawhin thu a sawi a, tuna Duet Exibition of Arts a neihpui Pi Asha  nen hian Lalit Academy Programme  atanga  in tawng chho an nih dan leh Asha chu  kermawi leh kut themthiam lama  kutchhuak tha tak tak nei a nih thu sawiin  Arts lama an kal dan leh hmalak dan te a sawi bawk.

Vawiin Programme  buatsaihtu te zing a mi Dr. Lalthanmawii Khalthang, Consultant, NPPCD  chuan Beng Enkawl uluk a tulzia leh  Beng hi derdep tak a ni a, ri hriatna chak lo enna khawl hrang hrang leh nau pianghlim  beng hriselna  lam enna  khawl te pawh a awm tawh a, chu chu a mamawh te tana rawn leh pan theih reng an nih thu a sawi bawk.

Heng Art Exhibition a phochhuah te hi Art Novelty, Chaltlang-ah tunkar chhung hian man tlawm te te a lei theih an ni ang.