Vawiin chawhma dar 10:30 hian Serchhip DC Conference Hall ah MLA General Election lo awm tura Serchhip District tana Election Commission of India in Expenditure Observer tura a ruat Pu Divakar Chakravarti, IRS chuan, Serchhip District Election Expenditure Monitoring (EEM) team hrang hrangte meeting a neih pui.

Expendirue Observer Pu Divakar Chakravarti chuan, Candidate tinte sum hman theih zat bithliah chu Rs. 20 Lakh a nih thusawiin, campaign-a ah dan hnuaia sum hman theihna (legal) expenditure leh dan phalloh zawnga sum hmanna (illegal expenditure) a awm thusawiin, candidate tinte sum hmanral kawng tinreng chu Election Commission of India in dan a siam ang thlapa endika umzui a nih zel tur thu a sawi a. Team hrang hrangte chu an chanvo thawh dan tur inziahna lehkhabu kawl reng tur leh bihngun tura fuihin, team tinte chu inmamawh tawn leh thawk ho vek an ni tih inhre turin a ngen a. Harsatna an nei emaw, zawh duh leh hriat duh an neih apiangte inthlahrung hauh lova zawt zel turin a ngen a ni. EEM Teams hrang hrangte a huhova meeting a neihpui zawh hian Observer hian Accounting Team leh Assistant Expenditure Observers te chu a hrangin meeting a neih pui leh a, chumi hnuah EEM Teams hrang hrangte thutna Room leh an inbuatsaihna te a hmunah a tlawhkual leh a ni.

Vawiina Observer in EEM Teams te meeting a neihpui hi Pu Chuauhnuna, MCS, Nodal Officer, EEM leh EEM Supporting Officers Pu R. Vanrengpuia, MCS leh Pu K. Saitluanga, MIS ten an tawiawm a. Election Expenditure Monitoring Teams hrang hrang, Assistant Expenditure Observers te, Accounting Team, Flying Squad, Static Surveillance Team, Video SUrveilance Team, Video Viewing Team, MCMC leh Control Room te an tel kim hle a ni.

Serchhip District Expenditure Observer atana Election Commission of India in a ruat Pu Divakar Chakravarti hi, Indian Revenue Service 2006 Batch niin tunah hian Income Tax Department ah Jt. Director hna Kolkata ah a chelh mek a ni.