Vawiin khan I&PR Auditorium-ah Aizawl DC/DEO kaihhruaiin inthlan chhunga candidate te sum senso (Expenditure Register) vawn dan tur inhrilhfiahna (training) neih a ni.

Training hi Aizawl DC/DEO Dr Franklin Laltinkhuma leh Master Resource Person Pu Lalrohlua, Under Secretary DP&AR ten an pe a ni. He training-ah hian Aizawl Assembly Constituency hrang hrang atanga candidate te leh an expenditure agent an kal khawm a ni.

Tarlan tawh angin inthlan chhung bika hman tur bank account candidate tin te hian an nei tur a ni a. Bank account-ah hian inthlan chhunga senso tur sum hmuh emaw dawn emaw an neih ang te dah luh tur niin, an hmuhna te kimchang taka ziah tur a ni a, amaherawhchu cheng nuai riat (8 lac) ai a tam tur a ni lo. Nomination file atanga chhiarin inthlan result puan thleng he bank account a sum che vel hi uluk taka chhinchhiah tur a ni. Bank account an siam kaltlang vekin expenditure hi chhut tur a ni. Cheng singhnih (20,000/-) aia tam lo chu sum faia lakchhuah theih a ni a, cheng singhnih chin chunglam zawng chu cheque hmang veka lakchhuah emaw pekchhuah tur a ni. Sum senso zawng zawng hi Form siamsa angin kimchang taka nitin ziah luh thin tur a ni. Candidate te nitin sum senso ziahluh hi Shadow Expenditure Monitoring Team-ten an lo siam aiin a tlem tur a ni lo.