ECI thuchhuah angin SMS hmanga thu dengkhawng leh tawngkam uchuak, mimal insawichhiatna, chi leh chi inkara boruak thalo siam thei, Election Dan leh Model Code of Conduct bawhchhe zawnga thu inthawn reng reng khap tlat a ni a, chutiang zawnga SMS dawng, complaint thehlut duh tan Police Mobile No.9436352995 ah SMS dawnna Mobile number ziak telin report/forward theih reng a ni e.

SMS hmanga campaign hi khap a ni lo va, campaign nana hmang an awm a nih chuan Service Provider ten a thawntu candidate / political party hming, address, mobile number, SMS thawn chhuah zat leh thawn man te chipchiar taka chhinchhiahin DEO hnenah report an thehlut tur a ni a, an mimal/party senso ah belh tel a ni ang. A ruala SMS thahnem tak thawnna (Bulk SMS) chu vote thlak hun tawp atanga chhiar leta hmalam darkar 48 chinah khap tlat a ni bawk.