Nihnih awh FMGE&W General Conference vawi 26-na chu vawiin Nov.18, 2009 hian Vanapa Hall-ah Pu H. Liansailova, Minister, DP&AR leh a dang tam tak enkawltu chuan Khuallian niin a hmanpui. He FMGE&W Conference hawnna hun hi Pu T. Sangkunga, Sr.Vice President-in a kaihruai a, zaithiam Mami Varte leh Lallawmzuali Khiangte ten zaiin an awi. He hun hawnna hun serh chu Pu R. Zoramthangan  hmangin Pu Ramhmangaiha Ralte-in lawmthu a sawi.

 

 

      
Khuallian Pu H. Liansailova chuan, “ Sorkar hi Chief Minister leh a hote an ni ngawt lova, Sorkar hnathawkte leh Ministry te infinkhawm hi a ni ber. Sorkar mi rawih leh inhlawhfa in ni ringawt lova, sorkar neitu in ni,” a ti. Motor hi a khawl  leh a body infinkhawm kha motor a ni angin, rorel pawl leh thawktute chu an zavaia infin hi sorkar a ni ber, tiin a sawifiah a ni. Sorkar hnathawk dik tak chuan eng pawl pawhin Ministry siam se, theih tawpin an tawiawm mai thin. Tunah pawh  pute duh anga in-adjust thei lo in awm chuan insiamtha turin ka fuih duh che u a ni,” a ti.
       
Pu Liansailova chuan, “Sorkar awm chhan  ber chu ram mipui, khua leh tuite hmasawnna thawk tura ding a ni a, chuta hmanrua te chuan rinawm taka thawh a ngai a; Sorkar hnathawk kalkhawmte hi mahni hamthatna ngaihtuahtu ang chauhva mipuiten an ngaih lohna turin mipui tana thawk taimak a tul a ni. Tunlaiin corruption hluar hlea kan  sawi thin hi a dik chuan ram chhiatna bul a ni a; mahse sorkar hnathawk zingah mi tha leh fel, rinawm tam tak in awm tih hi sorkarin a hai lo,” a ti. Tunlaiin kan chawimawi- Icon/Idol tih vel hi kan tihluar lutuk thei a, anmahni pawhin an chhiatpui thei. India ram pum leh eizawnna kawnga mi hlawhtling te, Sorkar hnathawk tha leh fel te hian chawimawi an phu em em a ni, a ti.
      
Mizoram Sorkar hian lang tlang taka hnathawh a tum a, sum hmanna te, thuneitute thiltihte hi mipui hmuh theih veka tarlan zel a duh. Hmasawnna hnathawh turin kan mi thiamte  aiin hnamdang an thiam chuang lova, rinawmna leh taimakna nen an thawh chuan kan ram tihmasawn turin nasa takin hna in thawk thei a ni. Dan rorelna zuia dik taka rorel hi a tlo va, a tha zel a ni.
        
Officer te transfer thuah sawipuitu rawih fo hi a tha lova; khawpui hlata awmte hi hotuten ngaihsakin motor \ha pek a, duhsak fo a \ul a ni. Mi rethei chawikanna \ha ber NLUP hlawhtlinna tura thawk theitu Sorkar hnathawkte hian theih tawpin sorkar hmalakna  in thlawp chuan a hlawhtling ngei ang, a ti bawk.
       
He Conference hian cawiin chawhnu leh naktuk nilengin ro an rel ang a, hruaitu thar an thlang bawk ang. Sorkarin 6th Pay hi pe nghal tawh se tih chu an thupui ber a ni a; DA pek lohte pe kim tur leh Interim Relief pe turin sorkar an phut.