No.5690/2020-2021 

Tukin zing khan Deputy Chief Minister Pu Tawnluia chuan Urban Development & Poverty Alleviation Department buatsaih programme pathum- ‘CLEANLINESS WEEK, 2020; MIZORAM CLEANLINESS COMPETITION, 2020 leh SENSITIZATION ON SWACHH SURVEKSHAN, 2021’ chu R.B. Mc Cabe Hall, Aijal Club-ah hawngin, khuallian a ni. Rural Development leh Information & Public Relations Minister ni bawk Pu Lalruatkima chu Khualzahawm a ni.

Khuallian Pu Tawnluia chuan thu sawiin Urban Development & Poverty Alleviation Department (UD&PA) hian ram hmasawnna turin kawng hrang hrangah hmaa la mek zel a, UD&PA Department hnuaiah Directorate, SIPMIU, Smart City leh AMC kaltlangin- Centrally Sponsored Scheme hrang hrang- AMRUT, HFA, NULM, SBM (U) bakah SEDP leh PAHOSS te a kalpuimek a ni, a ti a. Ramin a mamawhtak khawpui tih changtlun leh tihhmasawn kawngah theihtawp chhuahin hna a thawkreng a, heng zingah hian Swachh Bharat Mission (Urban) hi Mizoram Khawpui 23-ah chuan Faina leh Thianghlimna kawnga hmasawnna thlentu Mission hlawhtling tak a nihbakah bawlhhlawh sawngbawl kawngah tehna thawh dan tha leh daihrei zawk min kawh hmuhtu leh vantlang inthiarna thazawk kan neih theih nan Mizoram khawpui te tan a thawh hlawk hle a ni, a ti a. Kum 1977, October ni 2 atang khan Faina Hapta (Cleanliness Week) hi kumtin in Mizoram-ah hman tan a ni a, hemi chhung hian Mizoram khawpui mai ni lo Mizoram khawpui hrang hrangah pawh kartluanin Sawrkar pisa, zirna in, damdawiin leh hmun hrang hrangahte Faina beihpui thlakna hun atan hman ani thin a. Kumin ah pawh ‘Faina Hapta 2020’ hi Mizoram Khawpui 23-ah chuan faina leh thianghlimna kawnga infuih tharna hun atan leh a taka chetlakna hunah hman a ni leh a dawn a ; ‘Swachhta Rankings’ pawh kalpui a ni ang a. Zirna in, Sawrkar pisa, Dawmdawiin, VC/LC Area, Hotel, Bazar lehei tur zawrhnahmun (restaurant)-ah te fai endikna neih leh a ni dawn a ni, tiin a sawi.  He khawchhung bik ‘Fai Instihsiakna’-ah hian tunlai hripui leng mek COVID-19 do let na atana Sawrkar inkaihhruaina dan an zawm that leh that loh tepawh endik a ni dawn a ni, a ti a.

Khuallian chuan kumin Mizoram Khawpui Fai Intihsiakna hi ram pum huap fai endikna Swachh Survekshan zulzui a kalpui tur a ni a, Mizoram Khawpui 23 te ODF state (Pawn lera Inthiar awm lohna) kan nih vek tawh avangin kuminah chuan ODF Plus nih tumin hmalakna kalpui mek a ni a, a ti a. Hei bakah hian tunlai khawvelin a ngaih pawimawh emem, bawlhhlawh sawngbawl kawngah pawh mahni in emaw dawr leh eizawnna hmun hrang hrangah pawh tawih thei leh tawih theilo thliar hrante, bawlhhlawh hman nawn theihte a tangkai zawka hmannawn dan kawngzawn (reuse/recycling) te leh bawlhhlawh tawih thei atanga lei tha siam (composting) leh bawlhhlawh paih tih tlemte hi kumin Khawpui Fai Intihsiakna leh Swachh Survekshan endikna atana pawimawh zual tur te a ni, tiin a sawi. 

Deputy Chief Minister Pu Tawnluia chuan he intihsiakna tur atan hian mipuite pawhin mahni theihna zawn theuhah tih tur kan neive a ni tih hria in, kan in, kanveng, kan khawpui leh kan ram a lo hrisel a, Mizoram hi tun aia ram fai leh nuam zawka kan siam theihna turin mitin te sawmin; ‘Mizoram Khawpui Intihsiakna 2020 leh Faina Hapta 2020 bakah Swachh Survekshan, 2021’ chu lawm takin a hawng nghal a ni.

Khualzahawm Pu Lalruatkima pawhin thu sawiin, India ‘Hnam Pa’- Mahatma Gandhi piancham denchhenin Rural Development Department chuan thingtlangah vantlang inkhawm ‘Gram Sabha’ kumtin buatsaih a thin a, NREGS kaltlanga Labour Budget atanga hmalakna turin mipuite ko khawmin, khawtlang mamawh hrang hrang vawiinah sawiho a ni dawn a ni, a ti a. Thingtlang dinhmun zirchianna ‘Antyodaya Survey’ pawh Gram Sabha-ah hian bultan a ni nghal bawk dawn a ni, tiin a sawi. Khualzahawm chuan COVID-19 donna kawngah Faina hi a pawimawh a, faina hi mitinte mawhphurhna niin, chhungkua-ah bul tan ila, khawtlangah rampumah a lo kang darh dawn a ni, tiin a sawi.

Deputy Chief Minister hi MLA te Prof. F.Lalnunmawia, Pu C.Lalmuanpuia, leh Pu Zothantluanga leh AMC Mayor Pu P.C Lalhmingthang, AMC Deputy Mayor Pu Lalringliana, AMC Councillor R.Lalbiakthanga leh midangten an tawiawm a ni.

He hun hi UD&PA Director Pu H.Lianzela’n kaihruaiin, Khuallian leh Khualzahawm te hi a lo dawngsawng a. UD & PA Secretary Dr. C. Vanlalramsanga chuan Keynote Address a sawi bawk a, Joint Director (Admin) Pi Rita Lalnunmawii Pachuau chuan lawmthu sawiin he hun hi a khar a ni.

Mizoram Khawpui Fai Intihsiakna (Mizoram Cleanliness Competition) hi kum 2017 atangin UD&PA Department-in a kalpui a, Biate Khua, Khawzawl District in Mizoram Khawpui Fai Ber nihna a hauh mek a ni. Mizoram District Headquarters 11 te Category 1 ah awmin, khaw dang 12 te hi Category 2 ah an awm ang a, Mizoram Khawpui 23 atangin Khawpui Fai ber thlan a ni leh dawn a ni. He Intihsiakna atana inbuatsaihna tha zawk kalpui a nih theih nan Ministry of Housing & Urban Affairs in Swachh Bharat Mission (Urban) hnuaia kum 2016 atanga a kalpui tawh, Swachh Survekshan, ram pum huap fai endikna tura Inkaihhruainabu (Toolkit) a buatsaih, Mizo tawng lehlin niin Khawpui 23-ah thawnchhuah a ni.