No.5689/2020-2021 

Dated Serchhip, the 2^nd October, 2020:  Tukin zing dar 8:30 khan Pu Kumar Abhishek, IAS, District Bawrhsap chuan Serchhip Auditorium ah Cleanliness Week, 2020 a hawng.

Bawrhsap chuan thusawiin, India hnam pa Mahatma Gandhi pianchampha denchhena kum 1977 atanga Mizorama Faina Hapta hman tan chu Serchhipah pawh kum 2003 atanga hman a lo ni thin chu lawmawm a tih thu a sawi a. Mizote thinlungah faina hian hmun pawimawh tak changin faina hnatlangte pawh khawtlang huapa neih thin a ni a, hei hi hnamdangte tan pawha entawn tlak a ni a ti. VC te pawhin faina hnatlangte hi kalpui zel thin se a duh thu sawiin, he faina hapta hman chhung ngei hian department tinin faina hnatlang vawi khat theuh tal neih thei se a duh thu a sawi bawk. Swach Bharat Mission (Urban) hnuaia IEC Activity pakhat Faina inzirtirna atana Photography & Videopgraphy Competition, UD&PA Department leh Serchhip Photographers' Association tangkawpin an buatsaiha lawmman dawngtute hnenah Bawrhsap hian thuziak leh pawisa fai a hlan nghal bawk a ni.

Pi Vanthangpuii, DUDO Serchhip chuan Cleanliness Week, 2020 report a pe a, District Sanitation Task Force in he hun hi hman dan tur a ruahman anga hman anih thu a sawi a. Faina hapta hman anih chhung hian VC tinah faina hnatlang nei theuh tura ngen an nih bakah Mizoram khawpui fai leh India ram khawpui fai inelna atana inbuatsaih nan thla khatah vawi khat tal faina hnatlang nei thin tura beisei an nih thu a sawi bawk. Faina hi Faina Hapta hman chhung chauh ni lovin engtik lai pawhin kan nunah bet tlat sela, hmasawnna neih tumin, veng fai, khawpui fai nih tum zel turin kalkhawmte a sawm a ni. 

He hun hi Pu Lalzuiliana, Chairman Joint VC chuan kaihruaiin inlawmna thu a sawi a. Department hrang hrang hotute, Serchhipa khawpui chhunga VC hrang hrangte leh chanchinbu mite an tel a ni. He ni denchhen vek hian UD&PA kaihhruaina hnuaiah Serchhip Street Vendor te chuan Serchhip Bazar leh New Serchhip barzar an tifai bawk a ni.