No.5688/2020-2021

Ramchhung hmun dang rualin tukin zingkar khan Market Building Hall, Hnahthial-ah Faina Hapta 2020 hawnna inkhawm neih niin District Bawrhsap Pu Vanlalmawia chuan Khuallian niin a hawng a, "Fai hi kan tlin a, kan awmna hmun atang theuhin hma ila thar ang u" a ti.

Hnahthial-a Faina Hapta 2020 hawnna inkhawm hi Pu Lalremruata Sailo, SDO (sadar) leh DUDO ni bawk chuan kaihruaiin Pu Vanlalmawia chuan India Hnam Pa Mahatma Gandhi pianchampha pualin kalkhawmte chu chibai a buk a, Kum 2014 atang khan Sorkar laipui chuan Swachh Bharat Mission kalpuiin mitin in inthiarna thianghlim leh tha an neih theih nan te, Inthiarna hmun hma neilo chhungkua ten intawma an neih theih nan te, khawi ilo chhuah vah nikhuaah inthiar duhte tana inthiarna hmun Public Toilet siam te, tangkai zawka bawlhhlawh sawngbawl leh kawng hrang hrangah hmalak a nih thu a sawi a, Hnahthial-a Vantlang hmun thenkhatah pawh Public Toilet siam a nih thu leh a tul anga siam belh tum a nih thu sawiin "Vantlang hmuna inthiarna nei thalo khawpui chu khawpui nuam a ni ngai lo" a ti 

Kum 1977 atang tawhin Mizoramah Faina Hapta hman thin a nih thu sawiin Hnahthial District Bawrhsap Pu Vanlalmawia chuan "Swachh Bharat Mission laimu chu Fai leh thianghlim tura kan nunphung leh sukthlek tih danglam a ni" tiin inthiarna chu hmun pawimawh a nih thu leh hnam changkang a piangin an ulukin a dahna hmun pawh an ngaih pawimawh thu a sawi a ni. 

"Faina leh thianghlimna hi kan nunpui thei a, kan tlin a ni" tiin Hnahthial District bawrhsap Pu Vanlalmawia chuan "Khawtlang anga kan inrelbawlna hnatlang piahlamah hian fai turin tih tur tam tak kan nei a, zingkara mahni kawtkai lo phiat fai thin hmuh tam te hian thla a muangin nun a nuam a, kan taksa piahlama kan In leh a vel vawn fai hi mitin mawh a ni" a ti a. Kan Kuhva eina leh Meizial bung  paih te chuan ngaihtuahna luah se a duh thu leh a paihna tur hmun dik takah paih thin turin kalkhawmte a chah bakah Bawlhhlawh kan tih tam takte chu sum leh paiah chantir theih a nih thu te, kan nuphung a tan tangkai taka hman a nih theih thu te a sawi a, kumin 2020 Faina Hapta Kharna leh lawmman semna chu nakum 2021 January Ni 26 neih a nih dawn thu a sawi bawk a ni.

He hunah hian Cleanliness Core team member Pu Micky R.Lalenkawla, SDEO Hnahthial pawhin Mizoram leh India ram huap Fai inelna neih tur chungchang sawiin "Hnahthial hian hmana kan dinhmun kha kan luah leh thei a, chu aia sangah pawh kan awm thei a ni.Chumi tur chuan Kumin hian theihtawp chhuahin tan lak thar kan tum a ni" tiin Faina chu mimal tin leh chhungkua atanga bul tan theuh turin kalkhawmte chu a chah bakah Faina kawnga hmala tura intiamkamna a neihpui bawk a ni