Siaha; October ni 2: Tukin zing dar 7:00am khan DC conference Hall kawtah NULM Cell  leh BBBP Cell, DC office tangkawpte  huaihawtin Cleanliness Week-2020 hawnna  leh India Hnampa Mahatma Gandhi piancham vawi 150-na lawmna programme hman a ni.

Tukin Faina Hapta hawnna inkhawm hi Pu N. Lalzarzova, SDC in kaihruaiin,  bawrhsap Pu Kesavan R, IAS chuan khuallian niin programme a hmanpui. Pu Kesavan chuan thu sawiin, Faina tluantling nei tur chuan Fai hi tih than (habit)-a kan neih a ngai a ni. Kan taksa leh kan in leh lo  fai ringawtah i duhtawk mai lo vang u. Kan khawlai, kan tui luankawr leh kan tui lakna  hnar leh kan lui te a fai em tih hi kan vei tlan a  hun tawh takzet a ni, a ti bawk.

Pu K Beingiachhie, Sr.LAO, MADC pawhin thusawina hun hmangin; Siaha khawpui vawngfai tura an hmalakna hrang hrang leh hmachhawp te a tar lang bawk.

Faina Hapta hawnnaa kal khawm te hian faina kawnga kan District leh India hmasawnna tura bul tumtu leh mi dang kawhhmuh zeltu ni turin thutiam an la bawk.

Faina Hapta-2020 hawnna Programme hman zawh veleh hian India hnampa Mahatma Gandhi piancham vawi 150-na lawmna programme hman chhunzawm nghal a ni a. N.Lalzarzova, SDC, Nodal officer, BBBP chuan programme kaihruaiin Bawrhsap Pu Kesavan R, IAS chuan khuallian niin, thusawina hun a hmang. Pu Kesavan chuan  BBBP (Beti Bachao Beti Padhao) Scheme hi kum 2015 atang kalpui tan a ni a. Mipa naupang aia hmeichhe naupang an tlem fe zawkna district-ah te  kalpui a ni. Mizoramah chuan Sechhip leh Siaha district-ah te  he BBBP scheme hi kalpui ve a ni. BBBP Cell Siaha pawhin  an phak tawkin hmeichhe  naupang te dinhmun  chawikanna tur leh hmasawnna turin hma an la ve mek zel a ni,  a ti.

Dr Lalnunziri, SMO & Master Trainer BBBP chuan  kan  Mizo society-a mipa naupang leh hmeichhe naupang  kan thlir dan leh  chhungkua-a an  dinhmun tih thupuia hmangin thu a sawi a. Hmeichhe naupang aiin mipa naupangin ngaih pawimawh an hlawh zawk ṭhin a. Hmeichhe naupang hlam chhiah loa, zirna leh thil dangah pawh anmahni hmasawn zelna tur kan ngaihtuahpui a ṭul a ni, a ti.

NULM Cell,DC office chuan Cleanliness Week-2020 hawnna programme pual hian programme chhimtu zawng zawngte  hnenah  Nopui (mug) an sem bawk.