Faina Hapta 2011 chu Mamit khawpuiah pawh nimin atang khan ngawrh takin hman a ni a, YMA branch 6 te chuan vengchhung tifaiin, veng thenkhat chuan nimin khan hawnna neia hnatlang zuiin vengchhung kawngpuite an ti fai a. Chhimveng branch YMA erawh chuan tukin zing dar 7 khan hawnna hun buatsaihin hnatlang an nei nghal a. Hetih rual hian vengchhung tifaia section te inelna lawmman Chhimveng branch YMA chuan an nei nghal bawk a ni.

Faina Hapta hmanna ah hian District Level Committee chuan inelna chi hrang hrang vengfai (YMA), zirna in faia inelna te office leh compound faia inelna te, restaurant, tea stall, canteen faia inelna te, chanchinbu faina hawi thuziak tha inelna te buatsaih a ni a. Heng inelna ah te hian lawmman 1 na atanga 3 na thleng siam niin lawmman te hi faina hapta kharni 13 October, 2011 (Ningani) ah sem a ni dawn a ni.

Kumin 2011 faina hapta hian Mamit khawpuia YMA branch tinte hnenah hnatlang thingpui senso atan Rs. 4000 theuh pek an ni bawk. Heng bakah hian District pumpui faina kawnga hma kan sawn theih nan Sub Division leh Block Level ah pawh faina hapta hi hmang ve tura tih an bawk a ni.