Vawiin hian Lawngtlai DC Conference Hall ah Lawngtlai District Faina Hapta, 2015 kharna inkhawm buatsaih a ni a. Lawngtlai Bawrhsap Pu J. Hmingthanmawia chu khuallian a ni.

Khuallian chuan, faina hapta, 2015 chu khar mah ila, faina leh fai tura hmalakna lam chite chu kan khar thei lova, kan dam chhunga fai leh thianghlim taka nung tur kan nih avangin kan bei nasa deuh deuh zawk tur a ni, a ti. Faina Hapta hman chhunga thahnem ngai taka faina kawnga tha thawhtute chungah lawmthu a sawi a, bei chhunzawm zel turin a ngen bawk. Khawtlang hruaitute, zirna in hotute leh Office hrang hranga thuneitute chu mipuite zirtirtu an nih ang ngeiin entawk tlaka nung tur leh an thuneihna huam chhung enkawl fai kawnga tan la turin a chah bawk.

Faina Hapta chhung hian inelna hrang hrang buatsaih ani a, heng inelna te lawmman hi Bawrhsap hian a sem nghal bawk.

In elna hrang hranga lawmman dawngtute chu hetiang hi an ni. High School Level On the Spot Essay Writing Competition ah; Pakhatna T. Roengmawii, CL-X, ML Junior English School, pahnihna Lalthansiami, Cl –X, Southern Public High School leh pathumna Lalramluahsanga, Cl –X, ML Junior English School te an ni a. Office fai inelna ah pakhatna chu AH&Vety Office niin pahnihna chu District Education Office an ni a, pathumna chu District Soil & Water Conservation Office ten an dawng a ni. Zirna in fai inelna ah DIET, Thingkah chu pakhatna niin, pahnihna chu Model English School te an ni a, Pathumna chu Ngurnunsangi English School ten an la thung. Veng fai inelna ah Lawngtlai Vengpui (VC-1) chu pakhatna niin, Bazar Veng chuan pahnihna an la a, Chawnhu chu pathumna an ni thung.

Faina Hapta kharna inkhawm hi Pu Lallawmawma, SDO Sadar, District Project Officer, UD&PA in a kaihruai a ni.