Kumtinin October chawlhkar hmasa ber hi India Hnam Pa, Mahatma Gandhi piancham denchhenin Wildlife Week atan India rampum huapin hman thin a ni a, kumin hi a vawi 61 na a ni. Mizoram ah pawh Wildlife Week hi hunrei tak atang khan hmang tan in Environment & Forests Department chuan nungcha leh ramngaw humhalh beihpui thlakin hma alo la tawh thin a, kan ram a ramngaw leh nungchate an lo pun zel theihnan leh chenna tlaka kan siam zel theihna turin hmalak thin a ni.

Kum dang ang bawkin kumin ah pawh he Wildlife Week hi hman a ni a. Kumin atana theme chu 'Living with Wildlife' tih a ni. Environment & Forests department hnuaia Wildlife leh Forest division hrang hrangah hman a ni a, hemi pual hian vawiin khan DIET, Aizawl ah Closing Function hman a ni. Week denchhen hian Chief Wildlife Warden, Mizoram chuan Nungcha leh ramngaw te humhalh a tulzia leh pawimawhzia sawiin, hemi kawngah hian Environment & Forests department hian nasa takin hma ala mek a, amaherawhchu department hmalakna ringawt hi a tawk lova, mipuite tawiawmna leh thawhpuina a ngen bawk a. Nungchate leh ramngaw humhalhna kawnga nasa lehzuala tan la theuh turin mi zawng zawng a sawm thar leh a ni.

He function hi Principal, DIET in a kaihruai a. Chief Wildlife Warden, Mizoram in Keynote address pe in, Principal DIET in thusawina hun a hmang a. Mizoram University atangin Dr. Zothansiama, Asst. Professor, Deptt. of Zoology in 'Climate change and its effect on Biodiversity' tih thupui hmangin paper a present a, Pu Lalrinmawia IFS, Conservator of Forests (WL) in lawmthu sawiin Week hi khar a ni.