Tukin zing dar 7:00 khan District Level Committee on Cleanliness Week buatsaihin, October ni 1 leh ni 7, 2016 chhunga hman tur faina hapta, Cleanliness Week 2016 hawnna inkhawm chu Mizofed dawr kawtah neih a ni a. Lunglei District Urban Development Officer leh Committee Secretary ni bawk Pu Andrew Lalhruaia chuan kaihruaiin, Er. H. Duhkima, S.E., P.H.E. chu Khuallian a ni.

Er. H. Duhkima chuan Mizoram hian faina hapta hi thangkhat lian zet a lo kalpui tawh a, hei avang hian Mizote kan lo hrisel chho in, kan dam hun chhung pawh a lo sei phah a ni, a ti a. Sum a lei theih loh hriselna chu ram hmasawnna atana innghahna lungphum chu a ni, a ti. Faina kawngah penkhat kan la hmabak tiin, midang te tana hnawksak leh tenawm ni lo tura bawlhhlawh a paihna hmuna kan paih a ngai a ti a. Swachh Bharat Mission kaltlanga faina beihpui thlak mek a nih thu sawiin, faina hapta 2016 hi a hawng nghal a ni.

Pu Andrew Lalhruaia pawhin faina hapta chhung chauh a in vawngfai duh tawk lo in, nitin a kan awmna leh a chhehvel kan tihfai a pawimawh a ti a. Lunglei chu khawpui fai ber ni turin, mahni theih ang tawk theuh a tha kan thawh a ngai a ni, a ti bawk.

He hawnna inkhawmah hian District Level Committee member-te bakah tlawmngaipawl aiawh leh sikul naupangte an tel a ni.