Tukin (1.10.2016) zing dar 7 khan Lawngtlaia Areopagy hmunah Faina Hapta 2016 chu Lawngtlai District tan Bawrhsap Dr A. Muthamma chuan a hawng.

DC chuan Mizoram chu India rama state fai berte zinga mi a nih thu leh faina kawnga mipui rilru sukthlek pawh a dik tawk viauva a hriat thu a sawi a. Chutih rualin, in leh a vel, khawlai leh kawngpui dung vawn fai ringawt chu India ram faina beihpui (Swachh Bharat Mission)-in a tum a ni lo va, mimal in, office leh sikul tinin inthiarna tha leh thianghlim an neih theihna tur te, tui thianghlim hnianghnar taka an dawn theihna tur te, zun leh ek thlahdah mai mai an awm tawh lohna (open defecation free) tur tea hma lak chu a tum bulpui ber a nih thu a sawi. Hemi atan hian Lawngtlai District-ah hma lak mek a ni a; a bikin, Sangau Block chu open defecation free-a siam tura hma lak mek a ni, a ti bawk.

He hun hi LADC-a Sanitation Officer Pu HC.Vanlalruatpuia'n a kaihruai a. Zaithiam zai ngaihthlak a ni bawk. He hunah hian Lawngtlaia state sawrkar leh LADC hnuaia office hrang hrang officer leh staff te, NGO leh sikul naupangte an kal tha hle.

Hawnna hun hman zawh hian kal khawmte chu hmun 4-ah inthenin, Lawngtlai khawpui chhung kawng dunga bawlhhlawh te an chhar fai nghal a. Bawlhhlawh chhar fainaah hian DC leh officer-te pawh a tawp thlengin an tel ve a ni.

Faina Hapta hian October ni 7 thleng a awh dawn a. Hemi chhung hian office, zirna in leh veng fai te a hrang theuhva thlan chhuah a, lawmman pek an ni dawn a.He Hapta pual hian Middle School leh High School naupangte tan lem inziahsiak (painting cometition) leh, Higher Secondary School leh College zirlaite tan thu inziahsiak (essay writing competition) buatsaih tum a ni bawk.

Attachment

  • Loading attachment...