Tukin zing dar 7:00 khan Pu Lalhmingliana SDO(C) chuan Kawnpui Awithangpa Hall tual-ah Faina Hapta a hawng. He hunah hian VC, NGO hruaitu leh Officers te an tel tha hle. Hapta hawn hnu hian SDO(C) hovin khawtlang hruaitute chuan khaw chhung fang kualin vantlang tana hnawk kawng bula mimal bungrua leh kawng hnaih lutuk a In sak te an fangkual nghal a; thenfai ngai zual lai bik an enfiah nghal bawk.

Kawnpui Sub Division chhunga Village Council hrang hrang 15 te pawh an huam chhunga YMA Branch nena tangkawpin Fai hnatlang nei tura hriattir an ni a; hnatlang senso tur pawh Sanitation Committee in a pe a ni. Faina Hapta hman chhung hian Kawnpui Town chhungah Vengfai, School fai, Office fai, Hotel & Restaurant fai inelna neih tur a ni a. Zirna School zawng zawng ten chanpual insemin vantlang hmunhma an tifai bawk ang.

Pu Lalhmingliana SDO(C) Kawnpui chuan ‘Mahatma Gandhi kha zalenna sualtu ropui tak a ni tih kan hria a; mahse Faina leh thianghlimna hi a ngai pawimawh a, ‘Sanitation is more important than Independence’ tiin a sawi a ni a ti a. India rampuia Swachh Bharat Mission innghahna pawh Mahatma Gandhi-a ngaihdan ah thui tak a innghat a ni a ti bawk. SDO(C) chuan mi zawng zawngin Ek In kan neih a; inthiarna fel tak kan neih theih nan beihpui thlak mek a ni a; Kolasib Dist ah a hlawhtlinna kan hmu mek a; hmabak a tlem tawh a ni tiin Faina Hapta hawn hi a bul tanna niin tawp lova chhunzawm tur a ni a ti. Faina hi kan nunpui chuan kan tu leh faten an chhawm nung ang a; thinlungah a intuh dawn a ni a ti a. Khawlaia Naupang thil eina kawr awm nuaih hi naupang ten zirtirna an dawn \hat a pawimawhzia tilangtu a ni a ti bawk.