Vawiin khan Aijal Club ah Health Minister Pu Lal Thanzara’n launching of Prison HIV Intervention a hmanpui a, NACO (National AIDS Control Organisation) CDC ( Centers for Disease Control and Prevention ) leh FHI 360 (The Science of Improving Lives) te buatsaih ‘HIV Prevention, Care and Treatment Services in Prisons of North Eastern States of India’ bu a tlangzarh nghal bawk.

NACO ho bultum leh FHI 360 leh Mizoram SACS te hmalak na a kan ram ngeiah Prison HIV Intervention hawn thar a lo nih bakah he hun hmang tura Senior Officer te Delhi atanga NACO leh FHI 360 an lo kal thei chu lawmawm a tih thu sawiin khuallian Pu Lal Thanzara chuan HIV+ dona kawnga hmalatu mimal leh pawl hrang hrang te thawhrim na rah chu a hlawhtlin ngei a beisei thu a sawi a. Jail tangte zingah High Risk Group leh hetiang lam kawnga enkawl ngai tak tak te mamawh NACO ten hria a Prison HIV Intervention hawn a lo ni ta leh thahnem ngai taka thawktu Jail a Doctor leh Medical lam mi te hnenah lawmthu sawiin HIV vei ten enkawlna a thlawna an dawng thei tur chu lawmawm a tih thu a sawi .

Mizoramah MSACS leh mithahnemngai ten theihtawp an chhuah mek laia HIV vei hmuhchhuah a ni zel chu pawi a tih thu leh chutih mek laiin hetianga hmalak a nih chuan hmalamah kawl a en ngei a beisei thu sawiin Health Minister chuan mi thahnemngaite leh mi inpete thawhrimna ringawt hi AIDs do nan a tawk lova, mimal, pawl, kohhran te leh remchan dan hrang hranga mi tupawh in tih tak zeta an dopui leh an tlangau pui a tul takzet tawh a ni tiin chutih hunah chuan kan ram hi heng sual leh natna himlo lak atangin a lo him chhoh zel a beiseiawm a ni, a ti a. HIV veimek te a bik takin Jail a awmte uluk taka enkawlin a mamawh te hnenah HIV chungchang leh a kaihhnawih pawi theih zia hrilh uar nise, heng natna thlen theitu laka inven dan uluk lehzuala inzirtir nise a duhthu a sawi bawk.

Vawiina Prison HIV Intervention hawnna ah hian Pu Lalrinliana Fanai, Commissioner & Secretary, Health & Family Welfare Department in inlawmna leh programme sawihawnna hun a hmang a, Dr. Neeraj Dhingra Depurty Director General (Targerted Intervention) National AIDS Control Organiztion leh Dr Bitra George Country Director FHI 360 leh Dr. C V Dharma Rao, Joint Secretary, NACO, Ministry of H & FW, Govt. of India ten thu an sawi bawk a, Pi Lalthianghlimi ,PE, SHALOM in a nunkawng bumboh tak chhanchhuah a nih dan a sawi bawk. Dr Chawnglungmuana, Director SHALOM in Power point presentation hmangin ‘Scope of work of Prison HIV Intervention’sawifiah in an hnathawh dan leh dinhmun te a hrilhfiah nghal a. Dr Lalmalsawmi Sailo, Project Director, MSAC in lawmthu sawiin programme a khar a ni.