Lawngtlai District pum huapin vawiin chhun 1:00 PM ah khan DC Conference Hall-ah Faina Hapta kharna hun hman a ni a. Lawngtlai DC Pu B. Lalhmingthanga chu Khuallian a ni a, Pu Vanlalthaliana, Executive Member i/c Revenue Department, Lai Autonomous District Council chuan he hun hi kaihruaiin Pu Beila Khithie, EO & DPO, SJSRY, Lawngtlai-in Report a pe a; Pu Lalhmunsanga Lawtlai, SDO (S), Lawngtlai chuan Vote of thanks a sawi a ni.

Faina Hapta 2011 Kharna hunah hian Lawngtlai chhunga fai thlan chhuah hrang hrangte hnenah lawmman sem nghal a ni a. Veng fai berah Chanmari - I thlan niin 2-na leh 3-na te chu Bazar Veng leh College Veng te an ni a. Office fai berah Horticulture Office thlan niin 2-na leh 3-na te chu Superintendent of Police Office leh Chief Judicial Magistrate Office te an ni. Zirna in (sikul) fai thlanchhuah lawmman 1-na chu Govt. English Middle School, Vengpuiin an dawng a; 2-na leh 3-na chu Rev. Thanzinga Memorial School, Chawnhu leh Govt. Thingkah Middle School ten an dawng bawk. Hotel/Restaurant fai ber chu Sugar & Spice Restaurant, Bazar Veng a ni a; 2-na J&R Restaurant, Bazar Veng niin 3-na chu Lairam Hotel, Bazar Veng a ni. Lawngtlai District Hospital chu Hospital fai berah thlan a ni a. Faina lam hawi ziak tha chanchinbu thlan niin 1-na Lawngtlai Post, 2-na Ram Eng leh 3-na Lai Ram te an ni.

Faina Hapta kharnaah hian National Disaster Management Authority Day puala High School Level Painting Competition result pawh puan a ni a, lawmman sem nghal a ni. Lawmman 1-na dawngtu chu Hmangaihzauva, cl-IX, GRHSS a ni a; 2-na chu Langlen, cl-X, Don Bosco School niin 3-na chu K. Hmingthanzuala, cl-IX, Downtown English School a ni. Consolation prize mi 5 hnenah pek a ni bawk.

Lawngtlai DC Pu B. Lalhmingthanga chuan thil, a awm lohna hmun tura awm hi ‘bawlhhlawh’ a ni tih sawiin Fai hi Pathian anna a ni a ti a. Hnam fing, changkang leh hmasawn apiang an fai tih sawiin an nuna kan entawn tur pawimawh tak chu an invawnfaina a ni a ti. Faina chu rilru sukthlekah a inghat thui hle tih a sawi bawk. Lawngtlai khawchhung enkawla tihfai chu a khawchhunga mitin mawhphurhna a ni tih sawiin Faina tel lo hmasawnna chu hmasawnna khingbai a ni a ti a, Faina ngai pawimawh turin kalkhawmte chu a chah a ni.

Faina Hapta hi 3rd October, 2011 khan Areopagi, Lawngtlai Bazar-ah hawn a lo ni tawh a. Faina Hapta hman a nih chhung hian khaw chhunga veng hrang hrang te, vantlang hmun leh dawr te, sorkar pisa leh zirna in hrang hrang te ti faiin sorkar, tlawmngai pawl leh mimal ten’n hma an la nasa hle a ni.

Attachment

  • Loading attachment...