No.2538/2021-2022
Aizawl, the 8th October, 2021: October ni 2 atanga ni 8, 2021 chhunga Khawzawla Faina Hapta hman chu vawiin chawhma dar 11 khan Zuchhip Branch YMA Hall, Khawzawl-ah khar a ni.

Hapta kharna hun kaihruaitu Pu Ngurthansanga, DUDO, Khawzawl chuan faina chu thil kal reng, faina hapta khar a nih avang maia tawp tur nilo a nih thu sawiin, faina chu chhunzawm reng a tul a ni, a ti a. Khawlai leh tui luankawra bawlhhlawh paih mai mai leh chil chhak thinte chu dan bawhchhiatna a nih vek tawh avangin mi tinte fimkhur thar theuh turin a chah a ni.

Faina Hapta kharna hunah hian faina kawnga inzirtirna hapta thupui mila photography leh one minute mobile video clip intihsiak lawmman sem chhuah a ni a. Photography inelna huanga lawmman dawngtute chu pakhatna F. Vanlalpeka, Zaingen Veng, pahnihna Zoremsanga, Kawnzar Veng leh pathumna Lalnunmawia Hnamte, Dulte te an ni a, DUDO Pu Ngurhthansanga'n lawmman a hlan a. One minute mobile video clip inelna huanga lawmman dawngtute chu pakhatna Chuailo SHG, Zaingen Veng, pahnihna F. Vanlalpeka Zaingen Veng leh pathumna Lalrozauva, Electric Vengte an ni a, SDO Sadar Pu James Lalnithanga'n lawmman a hlan a ni.

He hunah hian veng tin VC ten faina hapta chhunga faina kawnga hma an lak dan hrang hrang report an pe a. Faina chungchang inzirtirna one minute mobile video clip competition lawmman dawngtu pathumte video siam leh photography lawmman dawngtute thlalak projector hmanga thlirho a ni a. Pu. C. Lallawmzuala, Urban Surveyor-in lawmthu sawiin hun a khar a ni.

Faina hapta hman chhung hian tihtur bituk hrang hrangte nitin kalpui thin a ni a. No Tolerance Day hman niin, Khawzawl Solid Waste Management Bye-Laws 2020 dan bawhchhia mi 6 te man niin, an pawisa chawi tlingkhawm hi Rs 350/- a ni. Heng bakah hian in leh a vel tihfai, hnatlangpui, PA System leh media kaltlanga fai inzirtirna, Office tihfai leh a dangte thawh a ni. Kharna hman zawh hnu hian Social media kaltlanga hmalaknate tarlanna campaign hman chhunzawm a ni bawk.