2470/2026-2027 

Aizawl Dated the 1st October, 2026 : Tukin dar 7:30 khan UD&PA Department leh PHED Department tangkawpin an buatsaih - Swachhata Hi Seva 2026 Campaign kal zela hmalakna pakhat Faina Hnatlangpui 2026 chu MINECO Open Gym-ah neih ni a. PHED Minister Prof. Lalnilawma chuan khuallian niin a hmanpui a, Faina Hnatlangpui 2026 a Kick-Off nghal a ni.

Prof. Lalnilawma chuan he hunah hian thu sawiin, Faina leh Thianghlimna chu mihring nuna thil pawimawh tak a ni a ti a. Sawrkar pawhin Faina kawnga ramin hma a sawn zel theihnan theihtawpin hma a lak thin thu a sawi bawk. Bawlhhlawh atanga thil tangkai siamchhuah lehna 'Waste to Wealth' leh Solid Waste Management chu a tangkaiin mi engemaw zatin eizawnnan an hmang tih a sawi bawk a ni. 

Minister in Faina Hnatlangpui 2026 a khuhhawn zawh hian MINECO leh a chhehvel tih fai hnatlang neih nghal a ni.

Faina hnatlangpui 2026 MINECO Open Gym a hmanna hi Pu V. Lalsangliana, IAS, Commissioner & Secretary, UD&PA Department in a kaihruai a. Pi C. Lalduhzuali, Joint Director (Admn.), UD&PA Department chuan Closing Remarks neiin lawmthu sawina hun a hmang. 

Swachhata Hi Seva 2026 Campaign hi India ram pum huapa faina leh thianghlimna kawnga hmalakna a ni a. October ni 1, 2026 hian India ram pumah ‘Ek Din, Ek Ghanta, Ek Saath’ – ‘Ni khat atan, Darkar khat, a huhovin’ tih thupui hmanga faina hnatlangpui neih a niin Mizoramah pawh hmun hrang hrangah he hmalakna hi kalpui mek a ni.