India ram puma state, district leh thingtlang khawfai inelna Swachh Survekshan Grameen, 2018 chu vawiin khan Aizawl District ah kalpui tan a ni ta a. Aizawl District Bawrhsap charge latu, Pu John L.T.Sanga, Addl. D.C-in inelna hi D.C Conference Hall-ah a hawng a ni.

Swachh Survekshan inelna hi India ram state, district leh khawpui tan bik siam a lo ni tawh thin a. Kumin ah hian Ministry of Drinking Water & Sanitation buatsaihin Swachh Bharat Mission(Grameen) Programme kal tlangin thingtlang khua te inelna hi lian tham taka buatsaih a lo ni ta a. He intihsiakna in a tum ber chu India ram puma state, district leh thingtlang khua te, faina lama hma sawn deuh deuh na tur leh inelna thianghlim neih chhoh zelna tura tih a ni a. He intihsiakna hian school, Anganwadi Centre, PHC, Bazar, Biak In hmun leh vantlang pun khawmna hmun hrang hrang te a huam a. Mipuiin faina lam kan hmelhriat dan, hmalak dan leh feed back te a huam bakah Ministry website kal tlanga MIS-a data thun a huam bawk. He intihsiana result hi kumin August ni 2 a puan tura ruahman a ni a. A endiktu tura Agency thlan chhuah, M/S Hindustan Thompson Associated Pvt.Ltd te chuan State, District leh thingtlang khaw thlan bikte chu August ni 1 atang hian an endik tan nghal dawn a ni.

Mizoram a district 8 te hi Open Defacation Free district a puan an ni vek tawh a; chhungtin in inthiarna ek in(Individual household latrines)an nei vek tawh a ni. Faina leh thianghlimna kawnga mipui vantlang  hma lakna leh a titha ber khuate hmalak dan rawn zir chiang tura Aizawla cham mek, Pu Prince Dhawan, IAS, Special Secretary, Government of Arunachal Pradesh chuan vawiina Aizawl District tana Swachh Survekshan Grameen inelna hawnna hi a telpui a ni.