“An Introduction to Polution Science (Mizo ) - Khawvel tibawlhhlawhtu leh a thenfai Hna’ Pu RC Thanga IFS Addl.PCCF (Retired) Pollution Control Board Chairman lehkhabu ziah chu vawiin khan PCCF Conference Hall Tuikhuahtlang ah Pu Lalrinmawia Ralte Environment & Forest Minister in a tlangzarh.

Khawvel hian kawng hrang hranga hmasawn lam a pan chhoh mek na ah hian boruak thianghlim leh faina, hrisel na te hi a ken tel leh tehna pawimawh tak a nih thu khuallian Pu Lalrinmawia Ralte chuan sawiin Mizo ten kan mamawh tak heti lam hawi lehkhabu Pu RC Thangan a buatsaih chu a lawmawm in lehkhabu tangkai tak ni se a duh thu a sawi a. Chhiartu apiangin chhiar liam mai lovin, a thu ken hi midang hnenah hrilh darha zawmtu ni theuh thei se,kan ram tan thil tha leh chhenfakawm tak a nih ngei a beisei thu a sawi bawk.

Kan khawlai leh incheina, kan inchhung te pawh a faiin a thianghlim sawt hle a, chilchhak leh thil paih mai mai te a inthlahrunawm tawh,mahse chutih lain kan in hnunglam kan tuichhe paihna leh kan kawmthlang vela kan vawm leh paih sulhnu te en chuan a la inthlau hle a, belhchian kan dawl lovin kan mizia a lang chiang a,kan hmai ala ti bal thei hle ani tiin Minister chuan kawng engkimah hian ze nghet neih a pawimawh a, tuina kawng leh hna ah chian tur a ni a, thiamna nei leh ram tana sulhnu nei tha,nunkawng uluk te chu an upat hnu ah pawh zah leh chawimawi an phu a, chu chu hnam changkanna te zia a ni a ti.

Bawlhhlawh leh tuichhia te hi duh tawh loh hnawl tawh hnu ni mahse a thenfai leh paih bo kawngah ngaihthah anih chuan chumi in a nghawng hri leh natna te chu a paihtu bawk in a tuar let ve leh theih dan sawiin E & F Minister chuan bawlhhlawh sawngbawl na ah pawh mitin in tan lak theih ani a, hal theih chi te chu tlem te te in mahni ni bulah a halral theih a, tawihthei lo leh hal chi loh te erawh chu mahni kawmthlang leh chhehvel luikawr velah te paih lovin a paihna hmunah paih zel tur ani a ti a. Solid Waste Management leh Water Pollution chhe zual zel tur lakah inveng in in zirtir a ngai a, bawlhhlawh hi hrisellohna hmahruaitu anih avangin kan inchhung mai ni lolvin kan inbul kawmthlang leh vantlang kawng leh hmun te theuh vawnfai anih chuan nasa takin faina leh hriselna ah hmasawn chhoh a nih rualin hei hian khualzin te pawh a hip ngei a beisei thu a sawi bawk.

Pu Lalduhawma kaihhruai vawiina lehkhabu tlangzarh inkhawmah hian a ziaktu Pu R C Thanga chuan lehkhabu ngaihnawm lam ai a lehkhabu tha leh tangkai anih dan te a sawi a.Pu Biakthianghliman sawi hawnna neiin SENVA ( Save Enviroment Association ) hmalak dante a sawifiah nghal in kalkhawm ten sawiho na hun tha taka an zui nghal ani.