365/2026-2027

Dated Aizawl, the 4th May, 2026 : PHED Minister Prof. Lalnilawma chuan vawiin khan E-in-C Meeting Hall, PHED Office-ah Faina Puitu mobile application a tlangzarh. 

He application hmang hian mahni sanitation point a bawlhhlawh paih motor thlen chin hriat theihna te, bawlhhlawh paih tur bik hriat theihna te, lungawi lohna thlenna te, mahni in atanga bawlhhlawh paih theihna te (Door to Door Pickup) a awm a. Bawlhhlawh re-cycle theih hralhna (Garbage Store) te, bawlhhlawh paih kawnga dan leh dun (Rules and Regulations) chhiar theihna te leh mipui tana hriattur pawimawh en theihna te pawh he application ah hian a awm bawk.. FAINA PUITU hi Android leh Mac ah download theih niin, kumin chhung (2026) atan man chawi loa hman theih niin, nakum (2027) atangin thla tin cheng 10 chawi a ngai tawh dawn a ni. Tunah hian Aibawk RD Blockah hman a nih tawh a, Aizawl Municipality huam chhungah erawh hman a la ni lo.

Minister Prof. Lalnilawma chuan FAINA PUITU tlangzarh theih a ni hi lawmawm a tih thu sawiin, “Mizoram pawhin khawvel hmasawn rualin ke kan pen ve zel a,hun leh tha save na tha tak a ni” a ti. Bawlhhlawh hi tangkai taka hman theih dan a awm a, zir bing mite chuan waste to wealth (Bawlhhlawh atanga rohlu siam) tiin an sawi bawk a ti.  Supreme Court thuchhuah siam, Solid Waste Management Rules, 2026 dik taka hman a nih theih nan, Aizawl pawnah chuan VC-te nen bawlhhlawh sawngbawl lamah hma lak an tum thu a sawi a, chung atan chuan he application hi a tangkai a rin thu a sawi bawk. Prof. Lalnilawma chuan New Education Policy (NEP) hnuaiah graduate attribute (graduate nihphung tur) tehna pawimawh tak pakhat chu faina lam ngaihsak a ni a; Mizote hi a langlo lamah kan fai em tih zawhna inzawh a tul thu a sawi.He application hi win-win solution (Mi zawng zawng tana hlawkna) a nih thu sawiin, a hman dan mipuite inhrilhhriat dan kawng zawn a tul thu a sawi bawk.

Tlangzarh programme hi Er. Zodinthari, PHED Engineer-in-Chief in a kaihruai a, Er. Lalropuia Hmar, Project Management Unit (PMU) Director in thu sawiin, Pu Laldinthara, Waste Technology and Bio Energy CEO leh Aibawk Plastic Waste Management Centre Operator ni bawk chuan he application sawi hawnna hun a hmang.Pu Laldinthara chuan he application hman dan tlangpui a sawifiah a, bawlhhlawh lakkhawmna kawngah app tangkai tak a nih theih ngei a beisei.