Hospital a tlawhna ah hian Pu Rinliana chuan Falkawn Referral Hospital chu  a tira ruahman angin khum 500 awm theihna tura tih puitlin tum a nih thu sawiin Nursing College leh Medical College thlenga la dah chhoh zel tum a ni, a ti a. He hospital hi Chief Minister-in a ngai pawimawh hle tih sawiin a nih dan tur ang taka ti puitling turin sum hmuh dan kawng ngaihtuah mek a ni, a ti a. Hemi atan hian Core Committee din ni se, a ti bawk.

Falkawn Referral hospital sak nan hian cheng vaibelchhe 45 hmuh a ni a. Tunah hian khum 50 chauh hawn la niin doctor 2 leh staff 28-in he hospital hi an enkawl mek a. Minister chuan hospital buildinga unit hrang hrang te chu chipchiar taka en chhuak vekin hna chhunzawm lehna tura hmalak dan tur te Health department hotute bakah PWD, P&E leh PHE department hotute nen an sawi hova. Hospital main building structure chu tichhe lovin a sang zawnga zauh belhna tur ruahmanna, Chief Minister hova an lo en tur siam turin PWD hotute chu a hrilh a. Tuna hospital mamawh tui leh power supply tha nei turin PHE leh P&E department hotute pawh chak zawka hma la turin a hrilh bawk a ni.

Parliamentary Secretary Pu S.Laldingliana pawhin vawiin ah chuan thu sawiin Falkawn Referral hospital chu a tira ruahman anga ti puitling turin hma lak a nih tur thu UPA Chairperson Pi Sonia Gandhi-in Mizoram a rawn tlawh hnuhnun ber tum khan a sawi a; chuvangin central sorkar chuan hemi chungchang ah hian Mizoram chu a thlahthlam lovang, a ti a. A nih dan tur ang taka he hospital ti puitling turin Health Minister tha tichaktu ah tang theuh turin thawktute leh department hrang hrangte a ngen a ni.