Ni hnih awh tur Entrepreneurship chungchang zirhona IGNOU Regional Centre leh Mizoram Entrepreneur Network te buatsaih chu vawiin chawhma khan I & PR Auditorium-ah RD Minister Pu R. Lalzirliana’n a hawng.

 

Hawnna thuchah sawiin RD Minister chuan eng sorkar mah hian mitin daih tawk sorkar hna a siam theih dawn loh avangin mahni eizawnna kawng Entrepreneurship Movement lama thanharh hi a pawimawh tak zet tawh a ni, a ti. Minister chuan department hrang hrang ten mahni intodelh leh eizawnna tling siam turin hma an la mek a. RD department pawhin mirethei BPL te tan kum thum chhunga an din khawchhuahna tur Programme fel tak SGSY a kalpui mek thute tarlangin hemi hnuaiah hian Self Help Group 1927 lai din a ni tawh a ti a. Self Help Group kaltlang hian ranvulh, huan siam leh pangpar chin thlengin hmalak mek a ni a ti. Pu Lalzirliana chuan Ministry of Rural Development hnuaia Special Project for Skill Development of Rural Youths duanchhuah chu Mizoramah pawh hman ve thuai tura hmalak mek anih thu a tarlang. Eizawnna kawng dik kawhhmuh tura zirtirna pe tura MEN ten hma an la mek chu Minister hian fakawm a tih thu a sawilang bawk.

Vawiina workshop hawnna inkhawmah hian IGNOU Regional Centre Director Dr. S.R. Zonunthara leh MEN General Secretary Joseph L. Ralte ten workshop tobul leh a kaihhnawih thil hrang hrangte an sawi a ni.