Vawiin khan NIB Conference Hall ah Food and Agriculture Organisation (FAO) leh Horticulture Department tangkawp buatsaih farmers field school kal loneitute leh anmahni zirtirtu Master Trainers te hnenah NIB Vice Chairman Pu PL Thanga’n Certificate a hlan.
Mizoram sawrkar leh UNO thawhdunna kal zela FAO leh Horticulture Department ten loneitute awmna hmuna Farmers Field School an buatsaih theih chu lawmawm a tih thu NIB Vice Chairman Pu PL Thanga IAS (Rtd) chuan a sawi a. Mizorama loneitute tan thawkho zel turin a sawm nawn leh a ni. NIB Secretary Pu James Lalrinchhana pawhin thu sawiin loneituten tunlai thiamna mil leh hlawk zawka thar chhuah an nei thei tur chu lawmawm a ti a. FAO kaltlanga zirtirna hi Mizoram loneitu tam zawk ten an chhawr tangkai theih tura hmalak a tul thu a sawi bawk.
FAO Programme Specialist Dr Konda Reddy pawhin thu sawiin Farmers Field School neih zawh tak hian Mizoram leh FAO thawhdunna atan rahbi thar a hawng dawn ani a ti.
Farmer's Field School hi 2016 June thla atang khan kalpui a ni a. Serthlum (M.Orange) leh lakhuihtheih chin dan tha zawk te an zir a ni. Hemi atan bik hian school hi Mizoram district tinah hmun 22 ah neih a ni a, 12 chu M.Orange tan bik niin a dang 10 te chu lakhuihthei chinna atan a ni. Hemi atana senso hi FAO leh NLUP Implementing Board in a tum a ni. Hei bakah hian Post Harvest Farmer's Field School hmun 6 ah neih a ni a, he mi atan hian FAO lamin a senso zawng zawng hi an tum ve thung a ni.
