Rural Development Department buatsaihin vawiin khan Sale of Articles of Rural Artisans Society (SARAS) Fair chu Assembly Annexe Conference Hall-a function buatsaihah Rural Development Minister Pu R.Lalzirliana’n a hawng. Hawnna inkhawmah hian MLA pasarih - Pu JH Rothuama, Chairman NIB; Pu RL Pianmawia, Deputy Chief Whip; Pu John Siamkunga, Chairman Mizoram Law Commission; Pu Lalrobiaka, Chairman, ZIDCO; Lt.Col ZS Zuala; Pu TT Zothansanga leh Pu Chalrosanga te an tel.
Pu R.Lalzirliana chuan sawrkarin Self Help Group kal tlanga mi retheite chawikanna tur National Rural Livelihoods Mission hnuaiah State tina SHG te enkawltu tura din Mizoram State Rural Livelihoods Mission (MzSRLM) chuan tun dinhmunah Kolasib, Serchhip, Mamit, Lawngtlai, Champhai leh Saiha District-a Block tinah hma a la mek a, a tahtawla hma zauh chho zelin kum 2022 hmaa Mizoram chhung District zawng zawng tuam chhuak turin ruahmanna a siam a ni, a ti. Minister chuan Sawrkar laipuiin a ngaih pawimawh he programme hi Mizoram sawrkar pawhin a ngai pawimawh hle tih sawiin SHG kaltlang hian mi rethei chhungkaw tam tak tan hmasawnna nghet leh bulfuk zawk a thlen ngei a beisei thu leh RD Department hnuaia SHG member-te theihna hai chhuak tura SARAS Fair buatsaih thin chu an tan hlawkna leh chona tha zawk siamtu a nih a beisei a. SHG rintlak taka kalpuite chuan hamthatna dang pawh an hmu zel dawn tiin an chakkhai lam nan, damdawi in an panna leh an eizawnna tanpuitu tur motor 18 lai November 22 khan a vai liam thu Pu R.Lalzirliana chuan a sawi.
Rural Development Minister Pu R.Lalzirliana chuan lo neitu hmeichhiate hamthatna atana hma la tur Mahila Kisan Sashaktikaran Pariyojana (MKSP) hawn a ni tawh a,Resource block 2 - Kolasib leh Serchhip district hnuaia block pali - Thingdawl Block, Bilkhawthlir Block, Serchhip Block leh East Lungdar Block-a SHG member mi 5000 ah bul tan tur niin tunah hian hma lakna chak taka kalpui mek a ni, a ti a. Thalaite tana kut themthiamna leh eizawnna ngelnghet pe thei turin DDU-GKY pawh kalpui mek a ni tiin DDU-GKY hnuaiah hian thingtlang lama cheng thalaiten eizawnna tlaka an thiamna tah hriamsak leh hna hmuhsak thlengin hma a la dawn a ni, a ti bawk.
Mizorama kum 2015 khan SARAS FAIR hmasa ber buatsaih a ni a, 2016 ah pawh hlawhtling taka buatsaih leh niin kumin 2017 ah Kolasib District ah leh Aizawl ah buatsaih a ni a. Tun tumah hian Block 17 atangin Self Help Group ten an thil zawrh chi hrang hrang an pho chhuak a, Stall hi 102 siam a ni. Kum danga la tel ngai lo Block 7 - Chawngte, Lawngtlai, Bungtlang S, Siaha, Ngopa leh Reiekte chu tun tumah hian an tel thar a ni.
Hawnna inkhawmah hian lawmman chi thum semchhuah a ni a. Village Organisation tha berah Bilkhawthlir North thlan niin Self Help Group titha berah Women Seven Star, N.Vanlaiphai leh Jeptha, Keitum te chu thlan an ni a. Self Help Group te hmasawnna tura thawhhlawk ber Champion Bank lawmman chu Thenzawl Mizoram Rural Bank Manager Pi Lalniliani Pautu hnenah hlan a ni bawk.
Hawnna inkhawm, RD Secretary Pu Lalhmingthanga kaihhruaiah hian Pi Lalchhandami, CEO, MzSRLM chuan report a pe a. RD Additional Secretary Pi K.Lalrinzuali’n lawmthu sawiin hun a khar a ni.
