Pu C. Ngunlianchunga, AH&Vety Minister chuan vawiin khan Mizo Academy of Letters (MAL) Annual Meeting, Govt. Hrangbana College Conference Hall a neih chu a hmanpui a, Pu Lalthangfala Sailo, President MAL chuan inkhawm hi kaihruaiin, Secretary, Treasurer leh Editor, Thu leh Hla atang ten reports ngaihthlak a ni.

Pu Ngunlianchunga chuan Mizo Academy of Letters (MAL) member te chu mizo thu leh hla tiphuisuia, tawng tihmasawna, tichangtlung tur leh mizo nunphung leh ziarangte humhalha vawng nung zel tura an pawimawhzia thu sawiin an thil ziah atang hian thangtharten thil kaltawhte leh mizo hnamzia an hriat theih phah a, thil inhrilh chhawn ringawt hi chuan kan hre kim lova chuvang chuan MAL te hian ziaka daha tan la thar leh turin a chah a ni. Tunlai thangtharte hian social media-ah te mizo tawng an hmang duhdah hle tawh a, hetah hian mizo tawng humhalha vawnghimna kawngah MAL members te an pawimawh hle a ni a ti bawk. Ziak mite hian ram rorelnaah pawh hmun pawimawh tak luahin an thil ziah atang hian ram hmasawn zawngin an kaihruai thei a ni a ti.

Chawhnu Inkhawm hi Pu C. Chhuanvawra, Vice President, MAL in kaihruaiin ‘Mizo Hnahthlak Chungchang’ tih thupui hmangin sawihona neih a ni a. Kum 2017 - 2019 chhunga MAL Hruaitu an thlang nghal a ni.

Mizo Academy of Letters hi ni 23.4.1964 khan din a ni a. Tunah hian Donor member 2, Life members 44, Annual member 77, mi thar leh a hlui leh affiliated Club 13 bakah MAL Jt.Headquarters Lunglei leh Chhimtuipui Academy of Letters te nen MAL thil tumte tihlawhtling turin hna a thawk mek a ni.