Champhai District chhunga Measles-Rubella (MR) Vaccination Campaign beihpui thlak dan tur workshop hawna chu vawiin chawhma dar 10 khan I&PR Auditorium, CHANEM Building-ah neih a ni a. Workshop hawnna hun tawi buatsaih hi Champhai District Bawrhsap leh District Task Force for Immunization ( DTFI) Chairman nibawk Pu Vanlalngaihsaka chuan khuallian niin a hmanpui a. Workshop hi Dr. Vanlalnghaki, CMO, Champhai District hova nilenga neih a ni.
Khuallian Pu Vanlalngaihsaka chuan khawvela Public Health Programme lian ber Measles-Rubella (MR) Vaccination Champhai District chhunga hlawhtling taka kal pui tur chuan line department hrang hrangte thawhhona tha neih angai a ni, a ti a. Hmaih bik awm lova a dawng turte hnena vaccination pek a nih theih nan uluk leh felfai taka hmalak angaih thu a sawi a. Vaccination Campaign kalpui anih hmaa zirchianna Workshop neih a ni chu lawmawm a tih thu sawiin hemi chhim tura kalkhawmte chu workshop hlawkpuia chhawr tangkaitu ni theuh thei turin duhsakna a hlan nghal a ni.
India rama Measles-Rubella za zela 90 aia tam mah hi naupang kum15 hnuai lam ten an vei ber a. MR Vaccine hi naupang thla kua atanga kum 15 inkar a mi ten an la thei a, tun dinhmuna Mizoram puma MR vaccine la thei naupang hi 3,92,902 an awm mek a hriat a ni a. Champhai District chhung bikah chuan naupang 38,895 vel hnenah MR Vaccination hi pek tum a ni.
He natna nuaibo emaw, titlem tur chuan Vaccine hi naupang kum 15 hnuai lam za zela 95 aia tam mah pek an ngai a; chumi tur chuan kum bithliah tumah hmaih awm lova MR Vaccine hi pek a ngai dawn a ni. Tunhma Measles Vaccine thin kha Measles leh Rubella natna do thei vaccine hmun khata awm kawp Measles-Rubella (MR) tiha kalpui tawh tura ruhmanna siam a ni a. Vaccination Campaign zawh anih hnuah hian Central lam atanga mithiam ten endikna leh naupang vaccine la thei za zela 95 chuangte hnenah pek vek anih leh nih loh an rawn zir chiang leh dawn a ni.
Ruahman dan chuan Vaccination Campaign hi kum thar January Ni 18 atanga phase hrang hranga kalpui tur a ni a. School atanga tanin , Khawtlang (Community) leh thual nawnna te neih a ni dawn bawk a ni. India ram chu kum 2020 ah chuan he natna awm tawh lohna rama siam hman tum niin chak taka hmalak mek zel a ni.
Vawiin MR Vaccination Workshop-ah hian he lama thiamna nei ten presentation an nei a. He hunah hian Champhai District huam chhunga Medical Officer-te, Concern Medical Staff-te bakah line department aiawhte an tel a ni.
