Vawiin chawhma dar 9:00 atang khan Food and Agriculture Organisation, UNO Team te chuan Mizoram hmalakna hrang hrang an tlawh kual.

Tuirial a Forest Department Nursery an tlawh a, hemi hmuna mau chi hrang hrang an tih tiah te chuan an mit ala hle a, tha zawk leh tam zawka mau chin dan te sawi ho a ni. Community Development Action & Reflection (CDAR) Centre, Tuirial pawh an tlawh a, Aieng leh Sawhthingsiamdan chi hrang hrangte an en a, hmalak dan te an sawi ho.

AH & Vety Department Selesih Farm a hmalakna chi hrang hrang an en bawk a. FAO Team te hian an haw thlak huna bawhzui atan uluk takin an thil hmuh leh hriatte hi an chhinchhiah a ni.

Central Agricultural University (CAU) Selesih-ah chawhnu dar 12:30 khan meeting neihpui an ni a, CAU Vice Chancellor Dr. SN Puri chuan meeting kaihruaiin Mizoramah Agriculture leh AH & Vety lama hmalak mek leh hmathar chhawp awmte a sawi a, Pu PL Thanga, Member Secretary, Mizoram Planning Board & Vice Chairman NLUP Implementing Board chuan FAO Team chu Mizoram a retheite chhanchhuahna leh kuthnathawktute chawikanna Programme NLUP leh a dangah pawh enpui a, hmalak  pui leh tha thar finchhuah turin zinah sawm an nih thu leh chutiang bawk chuan CAU chu hemi kawnga hmalakpui turin Mizoram Sorkar chuan a sawm thu a sawi.

CAU Vice Chancellor Dr. SN Puri chuan, Mizoramah ranvulhtuten harsatna an tawh  tam chhan ber chu inbiakpawhna leh kalkawng that tawkloh vangin ran damlote Doctorte hnenah duh angin an pan rang theilo hi a ni pakhat a, Mobile Clinic leh tul dang atan hmalak mek anih thu te a sawi lang bawk.

Dr. Peter E. Kenmore, FAO Team Leader chuan, FAO a an thawh chhungin India rama Plant Protection lam a lo enkawl thin dan leh Agriculture leh AH&Vety chungchanga hma an lak thin te sawiin, North East India ah hmalak chhoh mek tum anih thu te, Mizoramah a lokal in, hmalak mek te tha an tih thu leh chumi rualin felfai leh hlawk zawka hmalak a nih theih dan te an zin hawnah ngaihtuah anih tur thu te a sawi.

FAO Team te hian naktuk ni 12.10.2013 zing dar 9:00 ah Aizawl chawhmeh bazar thenkhatte an tlawh anga, chumi zawh chuanLengpuiAirportatanginDelhilam an pan tawh ang.