“Sawrkar in mipui hmasawn nana  ruahmanna a duante puanchhuah leh a hnathawh mipui hnena hriattir hi a tihtur dik tak a ni a. Mipui hmangchang hria, sawrkar khalh ngil tur an awm theih nana hriattirna pek chhuah hi sawrkar bat a ni, “ Pu Ramnghaka, DC Kolasib chuan a ti.

He thu vawiina RTI Week hmanna, Kolasib DC Conference Hall, Kolasib-a neiha a sawi a ni a. Right to Information Act hi mipui hmakhua liau liau, right a ni a. Sawrkar tha, dik leh langtlang siam turin a pawimawh a. Mipuite hian tun aia kan chhawr tangkai a tul a ni, a ti a. Deptt. thenkhat hotu, information, RTI Act hmanga an dil pe chhuak hreh an awm thin nia sawi tehi kan District chhungah chuan hetiang tih ching hi kan awm tur a ni lo, a ti. Pu Nghaka chuan RTI Act kan neih tak avangin sawrkar langtlang  kan nei chho mek a. Ram hruaitu MLA te leh Sawrkar officer te pawhin mipui hnena thudik puan chhuah chu an tihtur a ni tih an hre sawt hle tawh a, kan thu dawnsawn mil zela mihringte hi kal thin kan nih avangin mimal leh ram than nan thudik inhrilh hi thil pawimawh tak a ni, a ti a ni. RTI Act ah hi chuan roreltuten an rorelsak te lakah mawhphurhna sang tak an nei a ni, DC chuan a ti bawk a ni.

Pu H. Vanlalnghaka, Secretary, MJA, Kolasib chuan RTI Week hmanna inkhawm hi a kaihruai a. Pu H. Lalduhsanga, MJS, Secretary, Dist. Legal Services Authority chuan RTI Act chungchang chhui zauvin zirtirna a pe a ni.  Pi Lallianpuii, DIPRO, Kolasib chuan key note address pein kumin chu kum danga tihdan ang lovin Sawrkar Department mite sawm an ni lo tih a sawi a. Hei hi a chhan chu NGO hrang hrang YMA, VC, Prism, Churches, MZP, HZP, MSU leh Media ten an thil tawn leh hriatte tlang taka an sawi chhuaha, RTI hman tangkai chungchangah hma sawn zawk a nih theih nana ti an ni tih a sawi a ni.

Pawl hrang hrang aiawh kal khawmte hian sawi hona hun tha tak hmangin zawhna thahnem tak an zawt a. RTI Act hmang thin tawhtuten an sawi chhuah zingah Department thenkhat chuan File pawh an vawn that loh thu leh zawhna chhan hleih theih loh khawpa record an vawn mumal loh thute sawilan a ni.

RTI Week hi Mizoram State Information Commission leh I&PR Department tangkawpin an buatsaih a ni.