Vawiin chawhma dar 11:00 khan a tum hnihna atan Champhai I &PR Conference Hall-ah District Agriculture, ATMA leh Champhai-a Cable Operator te tangkawp chuan Farmers Scientists Interaction an buatsaih.

He inkawmhona Pu Lalthanzuala, DAO & Project Director, ATMA Champhai District kaihhruai ah hian loneituten hlawk zawka buhbal an thar theih nan, thlai chi hrang hrang chin leh sawngbawl dan ziktluak zawka inzirtirna neih a niin, Champhai leh a chheh vel, Zau hrang hrang a loneitu kalkhawmte chu Agriculture Department-a mithiamten zirtirna an pe a, buhbal enkawlna kawnga tih dan tha zawk leh hlawk zawka thlai an thar chhuah theihna tur kawng kawhhmuha hrilhin, loneitute pawhin buhbal chinna kawnga an daihriat leh harsatna an tawhte sawi chhuakin, thlai chin dan leh-enkawlna kawngah inpawh tlang taka inkawmhona hun hman a ni.

Agriculture Department lam atangin mithiam C. Lalnithanga Assistant Plant Protection Officer, Indian Council of Agriculture Research (ICAR), Kolasib Centre atangin Scientist pahnih Dr. T. Boopathi leh Dr. Rattan Kumar Singh, KVK Khawzawl atangin SMS Lalramengi te bakah District Agriculture atangin SDAO ten zirtirna an pe a, loneitute harsatna sukiang tura sorkarin hetiang hun a buatsaih sak thei chu hlawk thlak an tih thu leh lawmawm an tih thu an sawi a ni.

He hun kaihruaitu Champhai DAO Pu Lalthanzuala chuan Champhai District chhunga Agriculture Department hmalakna tarlangin:

1) WRC zau zawng - 8697 Hectares.

2) Thlai chin mekna zau zawng - 3750 Ha.

3) Thingtiang lo neih zau zawng -9893 Ha (2012-13), Buhbal thar chhuah zat -15195 metric Tonnes.

Champhai District hnuala NLUP pek dan:

Power Tiller Subsidy a pek             - 77

Mini Power Tillers Subsidy a pek     - 57

Water Pump Sets pek zat             - 80 nos.

Brush Cutters pek zat- 30 nos HDPE Pipes 75 mm a lian 572 rolls, 25mm 160 rolls, leh 16mm 100 rolls loneitute hnenah pek chhuah a nih tawh thu leh Agriculture Link Road 22.82 Kms. a thui Rs. 410 Lakhs a laih zawh tawh a niin, Land Development siam nan WRC 100 Ha a zau hmun 6-ah siam a nih thu leh Terrace 100 Ha. a zau hmun 4-ah siam zawh tawh a nih thu a tarlang bawk.