Thubuai rang zawk leh chak zawka chinfel a nih theih nan Fast Track Court, Kolasib chu vawiin khan Justice Michael Zothankhuma, Judge, Gauhati High Court & Portfolio Judge for Mizoram chuan a hawng.

Justice Michael Zothankhuma chuan Kolasib District huam chhunga pawikhawihna lian tham tak tak pawngsual case te, tualthah case te, ND&PS case te, POCSO Act hnuaia case te Aizawla ngaihtuah ngai tawh lo tura fast track court Kolasib District a hawn a ni ta chu hmasawnna mel lung pawimawh tak a ni a ti a. Heng thubuai bakah hian Motor Accident Compensation dilna chungchang te leh civil case appeal te pawh a ngaihtuah tawh dawn a ni a ti a. Pawikhawihtu ten an phu tawk hremna an hmuh a, dik taka rorel a nih theih nan mipui te Court thuneihtu te thlawp tha tur leh thuhretu a tang te pawh taima taka Court a inlan thin turin a chah a ni.

Pu H.Lalengmawia, District Bawrhsap chuan kalkhawm te lawmna thu sawiin, Fast Track court Kolasib District in a nei tur chu Kolasibin District tan hmasawnna rahbi pawimawh tak a nih thu a sawi a. Hawnna inkhawm hi Pu Vanlalenmawia, Addl. District & Session Judge, Aizawl Judicial District in a kaihruai a, Pu TL Guite, Registrar, Gauhati High Court, Aizawl Bench in Fast Track Court hawn a nih theih nana hmalakna hrang hrang te a sawi a ni.

Supreme Court of India in India rama State dang te ang bawkin Mizoramah pawh Fast Track Court din ve tura thupek a chhuah bawhzuiin Mizoram Sorkar chuan nikum 2015 khan hetiang court dinna tur hriattirna a lo tichhuak tawh a, Saiha leh Kolasib a din tura tih a ni. 4th August, 2016 khan khan Gauhati High Court chuan Judge tur a ruat fel a, Judge atan Pu R. Vanlalena, MJS chu ruat a ni.