1179/2024-2025

13th July, 2024 : Pu B.Lalchhanzova, Minister of State, FCS &CA leh LR&S chuan tunkar chhung khan Mizoram mamawh hrang hrang te buaipuiin Delhi leh Kolkata ah a zin. Minister hian July ni 10 khan Pu Pralhad Joshi, Union Minister for Consumer Affairs, Food and Public Distribution chu a chennaah hmuin National Food Security Act chungchang te leh Consumer welfare lama nasa zawka hmalak dan tur a sawipui a ni. Pu B. Lalchhanzova hian Mizoramah NFSA hnuaia awm tur awm silo engemaw zat awmte chu an awm ve theih nana hmalakpui turin a sawi pui a. Pu B. Lalchhanzova hian a tuk, July ni 11 ah Department of Food and Public Distribution Secretary Pu Sanjeev Chopra leh Department of Consumer Affairs Secretary Pi Nidhi Khare te hmu lehin Union Minister nena an inkawmna thute hi a bawhzui nghal a. NFSA quota tihpun chu India rampuma Household Consumption Expenditure Survey data te uluk taka zirchian a nih hnua ngaihtuah ṭhat tur a nih thu leh chu chu hun rei vak lovah hrual mum a nih a beiseiawm thu DFPD Secretary hian a sawi a ni.

Pu B. Lalchhanzova chuan consumer awareness leh rights chungchangah Mizoramah chuan consumer-te hi hmun dang aia an inthlarun avangin a bik taka ngaihtuah an ngaih thu a sawi chu DOCA Secretary chuan Minister hi proposal thehlut turin a lo rawn a ni. July ni 11 vek hian Minister chuan Pu Chanchal Singh, Secretary, Ministry of Development of North Eastern Region chu hmuin Land Revenue & Settlement Department tih changtlunna tur hrang hrang ruahmanna Mizoram sawrkarin a neih te chu tih hlawhtlin a nih theih nana theihtawp chhuahpui turin a sawm a. Pu Chanchal Singh, Secretary MDoNER chuan Minister thu thlente chu ṭha a tih thu leh tih hlawhtlin theih thilte an nih hlawm avangin proposal a luh hunah pawh a lo chhinchhiah tur thuin a chhang a ni.

July ni 12, 2024 khan Minister Pu B.Lalchanzova chuan Budge Budge, Kolkata-a Hindustan Petroleum Corporation Limited Oil terminal chu a tlawh bawk a. Pu Kaushik Roy Choudhury, General Manager East Zone leh a thawhpuiten lo dawngsawngin, Pu B. Lalchhanzova chuan Mizoramah  hmasawnna tam tak a thleng mek zelin; heng avang hian tuialhthei mamawhna pawh a sang chho zel a. Hemi vang hian HPCL hotute chu petrol retail outlet tam zawk Mizorama bun belh turin a ngen rualin khuarel chhiatna leh buaina dang a thlen thulha Mizoram a tuialhthei stock a awm theih nan Minister-in HPCL te Oil Depot siam tura a lo sawipui tawh pawh HPLC lam hian a rang thei anga bera a hmun tur enfel a, hmalak thuai an tum thu an lo hrilh bawk.