1178/2024-2025

2024 Vawkhniahzawn thla ni 13: Vawiin zing dar 9 khan Mizoram Health Minister Pi Lalrinpuii chuan Ṭawipui South-a sawrkar damdawi in, Primary Health Centre (PHC) a tlawh.

Health Minister Pi Lalrinpuii hi DHME Additional Director Dr SR Ngurchamliana leh Senior Medical Officer Dr Lalrinthangi te'n an ṭawiawm a. Khawtlang hotu (village council)-te kaihhruainain PHC Medical Officer Dr Lallawmawmi Tochhawng leh PHC staff-te bakah, Ṭawipui 'S' khawtlang mipuiin an lo dawngsawng a. PHC building leh hmunhmate lo fanpuiin, khawtlang mamawh hrang hrang leh an khawtlanga hriselna lam tihchangtlunna tur mamawh hrang hrangte a hnenah hian an lo thlen a ni.

Pi Lalrinpuii chuan tlawm ngai lo Lalnu Ropuiliani pasalṭha Hnawncheuva tunu a nih thu sawiin, Andaman tan in aṭanga a pu Hnawncheuva a lo chhuah hnuin Ralvawng aṭanga Ṭawipui khuaa an pem tak avangin Ṭawipui khua chu pi leh pu aṭanga mahni khua anga a ngaih tlat thu a sawi a. Ṭawipui 'S' PHC chu felfai taka enkawl a ni tih a hmuhin lawmawm a tih thu sawiin, ṭha taka enkawl zui zel turin thawktute a chah a. Khawtlang hruaitute'n khawtlang mamawh hrang hrang an lo thlente pawh uluk taka an lo zir chian tur thu sawiin, tih theih a neih chuan theih tawp chhuahpui a inhuam thu a sawi a ni.

Health Minister hian Ṭawipui South PHC a tlawh bakah hian Thingkah Sub-Centre, Thingfal Sub-Centre, Ṭawipui South Sub-Centre leh Ṭawipui North Health & Welness Centre te a tlawh bawk a. Thawktute nen inkawm hona hun ṭha tak an hman bakah, an harsatna hrang hrang a hnena an thlente chu Health Minister hian lo ngaihthlaksakin, a theih anga bawhzuipui a tum thu a sawi a ni.