1177/2024-2025

Champhai, 13th July 2024: Champhai Large Area Multipurpose Society (LAMPS) chuan vawiin chawhma khan tunhnaia an lawmman dawn pahnih - National Cooperative Development Corporation (NCDC) Regional Awards for Cooperative Excellence and Merit 2023 leh Mizoram Cooperative Apex Bank (MCAB) Best Cooperative Society 2023-24 te lawmna hun an hmang a. Cooperation Minister Pu PC Vanlalruata chuan khuallian niin he hun hi a hman pui.

Pu PC Vanlalruata hian tukin khan a department enkawl dang Agriculture leh Irrigation & Water Resources (I&WR) Department hnuaia pisa pahnih - District Agriculture Office leh Executive Engineer, I&WR Office  te a tlawh bawk a, thawktute nen inkawmin department hmalakna leh hmachhawp te an sawi ho a ni.

LAMPS Building, Champhaia lawmman dawn lawmna inkhawm neihah Pu PC Vanlalruata chuan Champhai LAMPS ten lawmman hlu tak an dawng chu chhuanawm a tih thu sawiin, kum 43 zet chhum lo chat lova Society nung tak an kal pui  thei chu midangte tan pawha entawn tlak darthlalang tha tak an ni, a ti a. Minister hian khawchhak tlangdungah Society nung tak tak - (Champhai LAMPS, Champhai Town Multipurpose Cooperative Society leh Vaphai Primary Agriculture Credit Society) te hmalakna chu ropui a tih  thu a sawi a, Cooperative movement tihmasawntu an nih ngei a beisei thu a sawi bawk a ni. 

Cooperation Minister chuan Mizoram sawrkarin a policy - Hand Holding leh thlai thar lei tihhlawhtlin nan Cooperative Society te tha chakna rin a tum a, amaherawhchu society thawhpui tlak an tlem a, society din thar leh tihchak kawngah tan lak a ngai tih a sawi a. Hun rei lo teah State Level Cooperative Development Council din a ni dawn tih tarlangin Pu PC Vanlalruata chuan District tinah District Level Cooperative Union din tum a nih thu a sawi bawk. Society enkawlna inkhaidiat mumal tak  a awm chuan society nung tha tak tak khaw tinah an awm chhoh theih a beiseiawm a ni, a ti.

Agriculture Minister ni bawk Pu PC Vanlalruata chuan kuthnathawktute hmakhua ngaiin sawrkarin thlai sawngbawlna lian zawk din tumin hma a la mek, a ti a. Cooperative Society ten he ti lama hma an lak duh chuan sawrkar a inhawng hle tih tarlangin, Champhai LAMPS te chu thlai sawngbawl lama an rilru seng turin a ngen.

Hun hman zawh hian Pu PC Vanlalruata hian New Champhaia Agriculture Department ram leh Champhai LAMPS ten NABARD  atanga cheng vaibelchhe 1.3 an hmuh hmanga an din Agriculture Infrastructure Building te a tlawh a. He mi hnu hian Aizawl panin Champhai a chhuahsan a ni.

Inkhawm hi Pu C. Ralkapzaua, Champhai LAMPS Chairman chuan kaihruaiin, Pu C Lalremliana, Chairman, Mizoram KVI Board; Pu  Robuanga, Additional Registrar, Cooperation; Pu K. Zorammuana, Addl DC, Champhai; Pu Lalmalsawma, Joint Director , Agriculture leh Champhai LAMPS aiawh te pawhin thu sawina hun an hmang a. Pu T Jarema, BoD in lawmthu sawina hun a hman zawhah inkhawm hi tihtawp a ni.