1176/2024-2025

Dated Lawngtlai, 12th July 2024 : Vawiin khan Social Welfare and Tribal Affairs Minister Pi Lalrinpuii chuan Shakti Sadan Office leh Observation Home Lawngtlai  chu a hmunah kalin a tlawh.

Pi Lalrinpuii chuan Shakti Sadan  hnuaia thawkten an hna ngaipawimawhin an thawk tha hle a, a lawmawm hle tiin hmalam hunah pawh thahnem ngai taka thawk zel turin a chah a. Mipuiten 'Shakti Sadan ' an chhawr tangkai tawk lo hle nia ahriat thu sawiin tun aia tangkai zawka chhawr turin awareness lamah tan tak a ngai hle a ti. Tun lai khawvelah hmeichhe naupang chauh ni tawh lovin mipa naupang ngei te pawhin pawngsual an tawk ta fo mai a, mitin kan fimkhur tlan a tul hle a ti. Sawrkar laipuia Ministry Of Women and Child Development hnuaiah hmeichhia  pawngsual tawk, baihvai, awmna mumal neilo, dan bawhchhia  leh thildanga harsatna tawkte tan tanpuina tha tak a duang a, heihi mipuite pawhin kan hriata chhawr tangkai ve a hun tawh a ni, a ti.

Social Welfare Minister chuan rethei leh chanhai zawkte tan sawrkarlaipuiin tanpuina scheme leh program tam tak a duang thin a, a puan darh kawngah uar zawka hmalak a ngai a ti a. Shakti Sadan  changtluk zawka kalpui zel tura  sum leh pai mamawh a hun taka dawng thei turin hmalak mek zel a ni, a ti . Sawrkarlaipuia Women and Child Development kaltlangin 'Shakti Sadan' hnuaia hmeichhia tanpui ngai tak takte tan chen lawkna tur  tam zawk sakna tur sum leh pai dil belh zel a tum thu a sawi bawk.

Pi Lalrinpuii chuan khawvel hmasawnna karah sualna a pung ve zel tih tarlangin, hmeichhiate dikna chanvo rahbeh anih lohna turin ke pen ve zel a tul a ti a. Lawngtlai district - ah ngei pawh harsatna tawk mek tam tak an awm thei a ni tih hriaa Shakti Sadan hnuaia thawkte theihtawp chhuah tur leh  anmahni  lo pan te chu duat tak leh hmangaihna nena lo enkawl turin a chah nghal bawk.

Pi Lalrinpuii hi Pu C. Lalnunfela, DPO, WCD leh a thawhpui ten an lo dawngsawng a. Harsatna leh mamawh an neih ang angte Minister hnenah thlenin, Pi Lalrinpuii chuan an harsatna te sukiang turin theihtawp chhuah a tum thu a hrilh a ni.