344/2023-2024

Kolasib dated 6th May 2023: Nizan khan College Veng YMA Hall, Kolasib chu Pu K.Lalrinliana, Minister, Food, Civil Supplies & Consumers Affairs Department, Kolasib Assembly Constituency bialtu MLA ni bawk chuan a hawng a, Pu R.Zarzoliana, President, College Veng branch YMA-in hun a kaihruai a ni.

Minister Pu K.Lalrinliana chuan Kolasib Assembly Constituency bial tih hmasawn nana MLA bialtu hmasa te hmalakna tarlangin a hlawhtlinna hmu tur a hmalak chhunzawm a ni chu lawmawm a tih thu a sawi a. College Veng YMA Hall, Kolasib sak puitlin a nih theih nana Sawrkar atanga tanpuina piah lam a khawtlangin sum leh tha an thawhna chu entawntlak a tih thu a sawi. Kolasib thalaite hrisel nan leh infiamna kawnga hmasawnna sawt lehzual a awm theih nan khelmual tha a awm a tul thu leh khelmual neihsa te changtlung zawk a chei a nih thu te Minister chuan a tarlang a. College Vengah Semi-Indoor Volley ball court sak tur a ruahmanna pawh a tak a hna thawh tan thuai a nih tur thu a sawi.

Intodelhna chuan ram leh hnam zahawmah a siam thin thu Minister Pu K.Lalrinliana chuan sawiin mahni phak tawk theuh a intodelh tur a hmalak a tul thu a sawi a. Zirlaite chuan thiamna chhawrtlak nei a, taimakna leh tumruhna nen kan ram chu kawng engemaw tal a intodelh a siam turin ruahmanna an neih a pawimawh thu a sawi a. Kan ram leilung hausakna haichhuahna kawngah te, a humhalh kawngah leh chenna nuam a siam tur a hmalakna kawngah tan lak tlan a tul thu a sawi bawk a ni.

Pu Thomas D.Lalengliana, President, Sub-Headquarters, Kolasib chuan ram hrang hranga awm zohnahthlakte inkarah inunauna leh inlungrualna tha a awm a pawimawh thu a sawi a. Kolasib district mipuite pawh zohnahthlak unauten buaina leh harsatna hrang hrang avanga thlamuanna zawnga rawn tlan lut an awm a nih pawhin inhawng tak a lo dawngsawng thiam turin kalkhawmte a chah a ni.

Pu R.Lalhmunsiama, Secretary, College Veng Branch YMA tarlan danin College Veng YMA Hall sakna hmun hi Pu Vanlalzawma, MP Lok Sabha hmalakpuina a lei a ni a, Hall hmun lei belh nan leh a sak chhunzawm nan hian chhungkaw tin atangin hmanrua leh remchan dan angin sum thawh thin a nih bak ah Minister Pu K.Lalrinliana kaltlangin MLA fund cheng nuai 10 hmuh a ni bawk a ni. Hall sak bultanna tur hian Pu PC Zoramsangliana, MLA kaltlanga MLA fund leh țanpuina dang ațangin cheng nuai 25 hmuh a ni a, hnatlang leh mi inphal tak tak ten sum, tha leh khawlte thawh bawkin Sawrkar office hrang hrangin tanpuina an pe bawk a ni. College Veng YMA Hall hi a dung feet 40 niin a vang hi feet 20 a ni a, a san zawng hi feet 20 a ni bawk.