345/2023-2024

Aizawl the 6th May, 2023 : Vawiin khan Home Minister Pu Lalchamliana kaihhruaina hnuaiah sawrkar hotuten emergency meeting an nei.

He meeting ah hian Home Minister Pu Lalchamliana chuan Manipur-a Zohnahthlakten harsatna nasa tak an tawk a, nunna chan hialte pawh an awm chu pawi a tih thu a sawi a, Manipur-a thil thleng chu Mizoram sawrkarin uluk takin a ngaihven reng a, Mizoram mi leh sa leh Zohnahthlakte an sahimna turin theihtawpa hma lain kawng a dap mek a ni a ti. Hetih rual hian Mizorama cheng Mizo mipuite chuan Manipur-a cheng Mizote tan a duhawm lo zawnga nghawng a neih loh nan tharum thawhna lam hawi zawnga che lo turin a ngen bawk.

Vawiina emergency meeting-ah hian Mizoram sawrkar hmalakna tur pawimawh tak takte rel a ni a, chungte chu :-

1. Mizoram mi, Manipur-a la tangkhang lo haw duhte a theih ang anga thlawhna ticket ngaihtuah sak. 

2. Manipur atanga raltlana lo kalte hnar lo a, a tul anga ruahmanna lo siampui.

3. Mamawh huna rokhawlhna a awm loh nan Ngopa, Saitual leh an khaw chhehvela petrol leh diesel te stock that. 

4. A tul hun atana Relief Camp siam a ngaih hun a lo awm takin, ruahmanna siam lawk tura Sub-Committee din. He Sub-Committee hian Camp siamna tur lo ngaihven a, a tul huna siam mai theih turin a lo inring ang. 

Vawiin meeting-ah hian Home Minister bakah Home Commissioner Pu H. Lalengmawia, Principal Secretary, Health & Family Welfare Pi Esther Lalruatkimi, DM&R Secretary Pi K Lalrinzuali leh Police Department-a hotu lute leh sawm bik mi pawimawhte an tel a ni.