346/2023-2024

Aizawl, 6^th May, 2023 :

1.     Vawiin chawhnu dar 1:00 khan Home Minister Pu Lalchamliana hovin Mizoram sawrkar hmalakna chi hrang hrang te thlir ho a ni a, hun lo kal leh zel turah kan inbuatsaih dan tur te sawiho a ni.

2.     Nimina Mizoram sawrkar hmalakna kan tarlanah khan Mizoram sawrkarin Imphal leh a chhehvela Mizoram mi leh sa tangkhang te – zirlai te leh zirlai ni lem lo te pawh Mizoram mi leh sa dik tak tangkhang te hruaichhuah nan thlawhtheihna charter / hire dawn a ni tiin kan sawi a, theihpatawp kan chhuah chungin kan bei a dawng ti tih tlat mai a, thlawhtheihna charter lamah kha chuan harsatna kan nei ta a ni.

3.     Nimahsela hetiang a ni chung chung pawhin kawng dang dapin commercial flight awm ang angah ticket kan book nghal char char a, theihtawp kan chhuah mek a ni.

4.     Tun dinhmunah commercial flight kan book tawh dan hetiang hi a ni :-

-         May ni 7, 2023 (Pathianni) ah mi 4 tan tan Imphal – Guwahati ticket book fel tawh a ni.

-         May ni 8, 2023 (Thawhtanni) ah mi 35 tan Imphal – Guwahati ticket book fel tawh a ni.

-         May ni 9, 2023 (Thawhlehni) ah mi 20 tan Imphal – Guwahati ticket book fel tawh a ni.

-          A vaiin tuna ticket book fel tawh zat hi mi 59 tan a ni.

-       Tun hun kal lai mekah (4:00 PM) hian mi 50 tan ticket kan book mek a, hun reilote ah kan tifel thei ang

-         Mi 78 tan ticket book turin confirmation kan hmu leh tawh bawk a, pawisa pawh bank lamah a tul ang ang kan deposit fel tawh bawk a ni.

5.     A remchan dan ang angin flight/airline chi hrangb hrangah ticket kan book tawp phawt rih lo thei lova, commercial flight a nih tlat avangin midang tam takin ticket an book ve a, kan charter thei ta si lo nen kan beisei ang leh kan duhthusam angin booking kan ti chak thei lo hi a pawi kan ti takzet a, heti chung chung hian Mizoram sawrkarin theihtawp a chhuah zel a. Home department mai bakah department danga official te leh travel agency te nen hmun khatah thu khawmin ticket booking hi kan buaipui char char a ni.

6.     Airlines hi a rem rem kan book a, a tlangpuiin Indigo, Air Asia leh Air India te an ni deuh.

7.    Kan boruak hi eng chen nge a kal dawn tih kan hre lova, chuvangin Manipura cheng kan unaute  Mizoram lama irawn insuan thla duh, tlang kawnga rawn luh ngai an awm thei a, chutih rualin tun mekah pawh engemawzat chu raltlanin an rawn lut der tawh a ni. Heng vang hian Ngopa khuaa petrol/diesel filling station te pawh POL chungchangah stock tam zawk nei thei tura ruahmanna siam turin kan hrilh tawh a ni.

8.     He buaina hi a reh hma loh chu Mizoram sawrkar hian a mi leh sa te hum turin leh a mi leh sa ten harsatna an neih lohna turin theihtawp a chhuah zel dawn a, helaiah hian tumahin ringhlel lo ila

9.    Chutihrualin Mizoramah Meitei engemawzat an cheng ve a, Manipur lamah kan duh loh tak thil a thleng a nih pawhin helaia cheng Meitei ten an tawrh ve na tur awm ang zawng a hmalak leh thil thleng awm lo turin Mizoram sawrkarin mitin te a chah tak meuh meuh a ni.

10. Chief Minister, Home Minister, Chief Secretary leh department hrang hranga kan thawhpuite, YMA, tlawmngai pawl zawng zawng te leh zirlai pawl te chungah vawiin thlenga lungrual taka Mizoram tan, Mizo hnam tana kan thawh tlanna ah lawmthu kan sawi a ni.