Vawiin chawhma khan Govt. D.S. Gorkha Middle School, Kolasib chuan kum 25 an tlin lawmna hun an hmang a, Pu K Lalrinliana, Minister of State for Food, Civil Supplies & Consumer Affairs department chu khuallian a ni.

Minister Pu K Lalrinliana chuan D.S.Gorkha Middle School, Kolasib din a nih theih nana hma lo la hmasatu Dhantale leh Sumitra te fakawm a tih thu sawiin he school a zirlai ten an zirnaa hlawhtlinna an hmuh hian he school din nana hma lo latute an chawimawi ve theihna ropui ber a nih thu a sawi. Minister chuan Mizoram sawrkarin zirna lama hmasawnna a awm theih nan hma a lak mek thu a sawi a, MLA fund hmang a DS Gorkha Middle School thawmthat a nih tur thu a sawi bawk a ni. Pu K Lalrinliana chuan Gorkhali te chu hnam rinawm leh kawm nuam tak an nih thu sawiin DS Gorkha Middle School in hmasawnna a hmuh zel theihna turin rinawmna leh inlungrualna nena thawk zel turin a chah bawk a ni.

Vawiin Silver Jubilee lawmnaah hian Pu Manu Subedi, Headmaster In-charge in report tawi a pe a, thawktu boraltate sunna hun hman niin  Jubilee souvenir ' Rajat Jayanti Smarika’ tlangzarh niin DS Gorkha Middle School a batch hmasa ber te chawimawina hun hman a ni a, naupang ten zai leh lam te entirin School Managing Board leh Middle School Teacher Association aiawh atangtein thu sawi ngaihthlak a ni bawk.

DS Gorkha Middle School hi 1994 khan private school anga din a ni a, school sak nan hian kum 1995 khan Dhantale leh Sumitra ten Cheng 45,000 an pe a ni. Kum 1995 vek khan adhoc aided niin kum 2003 khan provincialised a ni ta a ni. Tunah hian zirtirtu 6 leh zirlai 36 an awm mek a ni.