801/2023-2024

Kolasib dated 14th June 2023: Vawiin khan Pu K.Lalrinliana, Minister, Food, Civil Supplies & Consumer Affairs Department, Kolasib Assembly Constituency bialtu MLA chuan DRDO Conference Hall-ah Kolasib khaw chhung a Department Office hrang hrang a hotute a kawm a. Pu John LT Sanga, Deputy Commissioner chuan hun a kaihruai a ni.

Minister Pu K.Lalrinliana chuan District tihhmasawnna hna tha tak a kalpui tur chuan Sawrkar hnathawkte inkarah inpawhna leh thawhhona tha a awm a pawimawh thu a sawi a. Hmasawnna inkhairual leh mumal zawk a awm theih nan hetiang inhmuhkhawmna hi buatsaih fo a tul thu leh Office hrang hrangin kan hnathawhte kan inhriatpuitawn a pawimawh thu a sawi. Pu K.Lalrinliana chuan Sawrkar hnathawkte chu mipui tan a rawngbawltu, kut hnathawktute leh khawsak harsa zawk te chawikanna tur a mawhphurhna pawimawh tak tak chelhtute an ni tih hre reng turin leh hmalakna rintlak chauh kalpui thin turin a chah a. An hnathawhna leh an hmalaknate chu midangte tan a malsawmna thlentu ni ngei turin a fuih bawk a ni.

Hun kaihruaitu Pu John LT Sanga, Deputy Commissioner chuan Kolasib district chu Mizoram luhka, State thenawmte nen a ramri thui tak intawm leh Mizoram hmel tilangtu pawimawh tak a nih avangin Sawrkar hnathawkte chu kan ram leh hnam hmel lang mawi tur a mawhphurhna pawimawh tak nei an nih thu a sawi a. Office hrang hrang hmalakna inhriatpuitawn tur a FCS & CA Minister ruahmanna chu lawmawm a tih thu a sawi.

Vawiin a Kolasib khaw chhung a Office hrang hrang hotute Minister-in a kawmnaah hian In sak tanpuina pek chhuah dan te, Bawktlang Sub-Station panna kawng thawnthat ngaih pawimawh a tul thu te, mipuiin tangkai tak a an hman turin hmun hrang hrang ah Fair Price Shop sa tur a hmalak dan tur te sawi ho a ni a. Hriselna tih hmasawnna kawng a Program hrang hrang kaltlang a hmalakna kalpui a nih dan te, ei leh bar intodelh tur a buh, thlai leh ran vulh kawng a hmalakna tarlan a ni bawk. Kum 5 chhunga Department hrang hrangin hma an lak tawh dan leh an hmachhawpte tarlanna hun hman a ni.