2168/2022-2023
Kolasib dated 3rd October 2022: Vawiin chawhnu khan Extension Training Centre, SIRD & PR, Kolasibah Disaster Management & Rehabilitation Department buatsaihin Kolasiba Batch hmasa berte hnenah ni 12 awh tur training,‘Up-Scaling of AAPDA Mitra Scheme’ hawnna hun neih a ni a. Minister Pu K.Lalrinliana chu khuallian niin Kolasib district chhunga khaw pariat atangin thalai 50 an tel a, Pi Zosangzuali Pachuau, Joint Director, DM&R in hun a kaihruai a ni.

Minister Pu K.Lalrinliana chuan Mizoram chu lirnghin hlauhawmna state kan nih avangte, tui tla, lei min thlen tamna leh in leh ram kang thlen fona ram kan nih angin chhiatrupna a thlen chang pawh a nunna chhanhim a nih theih nan thiamthil neih a pawimawh thu a sawi a. Chung thiam thil nei tur a mumal taka inzirtirna ‘Up-Scaling of Aapda Mitra Scheme’ Kolasib district thalai 50-te tan buatsaih a ni chu lawmawm a tih thu a sawi. Aapda Mitra Scheme kaltlanga chhiatrupna thlen hun a chetlak dan tur hrang hrang an zir turte chu veng leh khawtlang tan a hmantlak ni tur a zir ngei turin a fuih bawk a ni.

He hun ah hian Pu John LT Sanga, Deputy Commissioner pawhin veng leh khaw hrang hranga Aapda Mitra Scheme hnuai a Training chhuak an awm a tul thu a sawi a. He Scheme hnuai a training chhuak tawh te chu chhiatrupna thlen hun ah pawh mumal tak a chetlak hmasa a tang zel turin a chah. Pu Lalrinawma Traite, Joint Director (Ops), DM & R chuan Training kalpui dan tur tlangpui tarlanna hun a hmang bawk a ni.

Aapda Mitra Scheme hnuaiah hian chhiatrupna thlen chang a mumal tak a chetlak dan tur zirtirna kalpui thin a ni a. Aizawl bak ah hian Mamit, Kolasib, Serchhip, Lunglei leh Champhaiahte kalpui tur niin heng District atangte hian thlalai 100 zel thlanchhuah an ni. Kolasib district tan a 1st Batch-ten Training an neih zawh hian 2nd Batch ten training an nei chhunzawm lehnghal dawn a ni.