2167/2022-2023

Champhai, the 3rd October, 2022: Blood Bank, District Hospital Champhai leh Association for Voluntary Blood Donation (AVBD), Champhaite tangkawp buatsaihin vawiin chawhnu dar 1 khan Kahrawt Community Hall, Champhaiah National Voluntary Blood Donation Day 2022 puala hun hman a ni. He hun hi District Bawrhsap Pu James Lalrinchhana chuan khuallian niin a hmanpui a ni.  

Khuallian Pu James Lalrinchhana chuan hmathlir thui tak leh hmabak eng tak nei zirlaite nena National Blood Donation Day hmanho a ni thei chu lawmawm a tih thu sawiin, thisen mamawhna san zia leh pek tulnate thehdarhtu nih tum turin zrlaite a sawm a. Mamawhtute tan leh chhiatna thlen thulha hman mai theih tur thisen dahkhawlsa neih reng a pawimawh thu sawiin, thisen pek chu keimahni tan mai nilo midangte tana malsawmna a ni, a ti a. Midangte tana luangchhuaka thisen pe thinte ngaihsanna chang kan hriat a tul a, an hniakhnung zui kan tum tur a ni, a ti bawk.

District Bawrhsap chuan nakin lawka ram leh hnam kaihruaitu tur zirlaite chu taksa leh rilru hriselna ngaipawimawh tur leh, ruihhlo leh a kaihhnawih laka fihlim tum turtein a sawm a. Khawvel thang leh hmasawn mek karah midangte umphak ve thei tura tanlak a tul thu sawiin, zirlaite chu lehkha chhiar nasaa rualelna dik neih tum turin a fuih a. Nunkawng dik leh hrisel zawh a, thisen chhuahtu ni lova a mamawhte tana petu nih tum turin a chah bawk a. Taksa, rilru leh thlarau hrisel nei thei tura thuawihna, tuarchhelna leh taimakna neih tum tura fuihin, thisen pek kawnga midangte tana entawntlak nih tum theuh turin a sawm a ni.

He hunah hian HIV chungchang inzirtirna buatsaih a ni a, Resource person Dr. PC Lalawmpuia, MD, District Hospital Champhai chuan HIV 1 leh 2 a awm thu sawiin, HIV positive zinga za zela 80 te chu HIV 1 kaite an nih thu a sawi a. Mizorama AIDS dinhmun tlangpui tarlangin, Champhai District bikah nikumah HIV positive 96 hmuhchhuah a nih thu leh, kumin April-August chhungin HIV positive 65 hmuhchhuah tawh a nih thu a sawi a. HIV inkaichhawn dan hrang hrangte tarlangin, mipat hmeichhiatna inkaichhawn an tam ber thu a sawi a. Ramri depah hrileng a hluar thin bik thu sawiin, fimkhur a tul nasat bik thu a sawi a. Kalkhawmte chu ruihhlo leh a kaihhnawih laka inthiar fihlim turin a chah bawk.

Thusawitu dang District Hospital Champhai Blood Bank Officer Dr. Krossnunpuii chuan tlawmngaia thisen petu voluntary blood donor thahnem zawk mamawh a nih thu sawiin, thisen endik thlap sa, mamawhtu apiang tana hman theih tur a awm reng chu nun chhan nana pawimawh tak a ni, a ti a. Thisen pe thei turin ei leh in-a fimkhur, nun uluk, taksa insawizawi that leh mut that angaih thu tarlangin, hmeichhiate tan thla 4 danah leh mipa tan thla thum dana thisen pek a him thu a sawi a. District Hospital Champhai Blood Bank atangin kumin June thlaah thisen unit 161, July-ah unit 138 leh August thlaah unit 134 pek chhuah a nih thu sawiin, thisen mamawhna a sang hle a ni, a ti a. Zirlai kalkhawmte chu kum 18 an tlin hnuah thisen pek theuh tum tur leh midangte kawhhmuhtu nih tum turin a chah a ni.

He hun hi District Medical Superintendent Dr. Zatluanga, President, AVBD Champhai chuan kaihruaiin Secretary Pu C.Zaihmingthanga'n report a pe a. Pu PC Lalchuangkima, Asst. Secretary, AVBD Champhaiin lawmthu sawiin hun a khar a ni.

AVBD hi Champhaiah 2009 ah din a ni. Kum 2021 chhung khan blood donation camp tum 27 neih a ni a. Pawl hrang hrang atangte leh mimal thisen pe mipa 898 leh hmeichhia 205 awmin, thisen unit 1103 an pe a. Heng bakah hian thisen hman rulhna tura thisen pe replacement donor mipa 68 leh hmeichhia 12 ten thisen unit 80 an pe bawk a. Kum 2021 chhunga thisen pek zawng zawng belhkhawm chu unit 1183 niin, mipa 966 leh hmeichhia 217 ten thisen an pe a ni.