2166/2022-2023
Siaha; the 3rd October,2022: Vawiin chawhnu dar 2:00Pm khan DC Mini Conference room-ah Excise Minister Dr.K.Beichhua hovin District Level Ruihhlo do Committee chuan meeting an nei a.Meeting hi Minister Dr.K.Beichhua'n a kaihruai nghal a ni. District Level Ruihhlo do Committee-ah hian DC Chairman niin, MTP(H) President chu Member Secretary a ni a, SP chu Convener a ni thung. Committee Member-ah hian Head of Office tha hnem tak, MJA president,NGOs hrang hrang President te, Kohhran hrang hrang aiawh te leh Joint VC aiawh te an tel a ni.

Vawiin meeting-ah hian thu sawiin, Minister Dr.K. Beichhua chuan tunah hian Ruihhlo chi hrang hrangin nasa takin min run mek a, Sum indaih loh thu leh Man power indaih lo thu sawi hman leh kan indaih hun nghak hman kan ni ta lo, Ruihhlo vin min tihchhiat zawh vek hma hian, tunah kan dinhmun leh kan nihna ang ang hian thei tawp chhuahin Excise leh Police te nen kan tlawmngai pawl leh Kohhran hrang hrang te, VC te leh chanchinbu mi te nen tang hovin ruihhlo do beihpui i thlak leh teh ang u, tiin ngenna a siam a.Tlawmngai pawl leh Kohhran hrang hrang ten Ruihhlo dona kawnga sorkar an thlawp tlat thin chu lawmawm a ti thu sawiin, Mipui thlawpna lo chuan Sorkar chakna chauh chuan Ruihhlo hi do hneh chi rual a ni lo, a ti. District Level Ruihhlo do Committee te hmalakna turin cheng nuai 300 dil mek a ni thu a tarlang bawk.

Excise Minister chuan State Level-ah Ruihhlo do Core Committee leh Working Committee te din a lo ni tawh thu leh Core committee chu Chief Minister hona hnuaiah kalpui a ni a, Working Committee erawh amah excise Minister hona hnuaiah kalpui mek a nih thu a tarlang bawk.

Vawiin District Level meeting chuan Local Level leh Village Level Ruihhlo do Committee din a rem ti a, Local Level leh Village level committee hruiatute hi District Level Committee in a ruat hlawm dawn a ni.

Vawiin meeting-ah hian Siaha district in Ruihhlo dona kawnga hma a lo lak tawhna leh hmachhawp hrang hrang te chu DC,SP, Asst.commissioner of Excise & Narcotics leh CMO atang ten report ngaihthlak a ni a.Hmalak zel dan tur pawh Huangzau taka sawihona neih a ni.