2165/2022-2023
Khawzawl, the 3rd October, 2022: National Wildlife Week, 2022 hawnna chu vawiin chawhma dar 11:00 khan Wildlife Division, Khawzawl bultumin Zaingen YMA-ah neih a ni a, he hun hi Khawzawl District Bawrhsap Pu C.C. Lalchhuangkima chuan khuallian niin a hmanpui a ni.

Khawzawl S.P. Pu Lalchhuanthanga kaihhruaia hun hmanah hian khuallian District Bawrhsap Pu C.C. Lalchhuangkima chuan National Wildlife Week hawnna neih a ni chu lawmawm a tih thu sawiin, mizote zingah nungchate hmelma anga en leh a that thei nih inchhuang an awm thin chu pawi a tih thu a sawi a. A bik takin Rul phei chu a that thei nih kan inchhuang a, thenkhat phei chuan Social Media-ah te kan Rul thah kan pholang thin a, hei hi Wildlife Act-ah chuan man theih a ni a ti a. Khawzawlah pawh hian Rul leh nungcha dangte an thah avanga chhui a, man tawk an awm phah a, thenkhat phei chu Social Media-a an thehdarh atanga hriat chhuahte an ni a ti a. Hetianga nungchate tih hlum leh a sa zuar thin zinga tam takte chu dan bawhchhia tih inhrelo te an ni fo thin a ti bawk.

District Bawrhsap chuan zirlai kalkhawmte, a bik takin mipa te chu hun reilote-ah Silai lawm rual an nih dawn avangin nungchate danin a humhalh dan hre fiah turin a chah a, hun remchang hmasa berah High School, Higher Secondary School leh College Student-te tan Wildlife Act chungchangah inzirtirna buatsaih tha a tih thu a sawi bawk. Tunlaiah Airgun a tha tawh a, sava an kap tla teuh zel a, hei hian kan ram nungcha sava te a ti rem nasa em em a ni a ti a. Tunlai thalaite chuan hei hi kan tih loh tawp tur a ni tiin, Airgun an lawm anih pawhin Sports atan ni se la, nungcha te kap lovin inthemthiamna competition lamah hian tui zawk ni se a finthlak zawk a ti bawk.

He hunah hian Khawzawl DFO, Wildlife Division Pi Lawmnapari chuan report pe in Khawzawl Wildlife Division hian kum 2011 atangin Wildlife Week hi an hmang tan tih a sawi a. Kuminah hian Wildlife Week pualin High School leh Higher Secondary School zirlaite pualin Essay Writing Competition buatsaih anih bakah Khawzawl Range R.O. te nen Joint Patrolling neih a ni bawk. Khawzawl Wildlife Division hian kumin March ni 3 khan Tuipui Bazarah Sava rep thahnem tak leh Thehlei rep thahnem tak an man a, hemi thla vek ni 21 khan Tualpui khaw pa pakhat hnen atangin Sakhi leh a kahna Silai an man a, June thla khan Vankal khaw pa pakhat hnen atangin Vahrit pum 3 leh Sakuh sa an man bawk. Khawzawl Wildlife Divison hian Silai 13 an man bakah Silai tun 1 a awm bawk a ni.

Vawiina National Wildlife Week hawnna Programme-ah hian Week puala Essay inziahsiak buatsaih a ti thate hnenah lawmman sem nghal a ni a, High School tana Essay Competition buatsaihah hian mi 36 telin Higher Secondary School tana Essay inziahsiakah hian zirlai 9 an tel thung a ni.

Lawmman dawngtute chu -
High School :-
1. Fergie Hlimpuii, Class X, PES Khawzawl
2. Isak Malsawmdawngkima, Class X, PES Vengthar
3. K. Lalnunfeli, Class IX, Govt. Khawzawl High School

Higher Secondary School :-
1. Megara Lalramthari, Class XII, Khawzawl Higher Secondary School
2. Vanlalthatluanga, Class XII, Khawzawl Higher Secondary School
3. Lalthansanga, Class XII Khawzawl Higher Secondary School

National Wildlife Week, 2022 hawnnaah hian Hon. Wildlife Warden, Khawzawl District Pu P.C. Rosiama bakah Rev. James Lalremmawia, Counselor, FG&CC ten thu an sawi a. Wildlife Division Staff, Forest Department Staff-te leh Khawzawl Higher Secondary School zirlaite bakah sawm bikte an tel a ni.