3090/2022-2023

Aizawl 16th December 2022: Vawiin khan Synod Conference Centre-ah Food Civil Supplies and Consumer Affairs Minister Pu K Lalrinliana chuan Mizoram Consumers’ Union (MCU) Annual General Meeting leh kum 25 tlin lawmna (silver jubilee celebration) chu khuallian niin a hmanpui a, silver jubilee puala buatsaih souvenir a tlangzarh nghal a ni. Pi Ramdinliani, Secretary, FCS & CA chu khualzahawm niin Pu Laldawngliana, Vice President, MCU Hqrs. in a kaihruai a ni.

Silver jubilee lawmna programme-ah hian Khuallian Pu K Lalrinliana chuan thusawiin MCU in kum 25 hmel hial a lo hmu ta chu a lawmpui takzet thu a sawi a. MCU hruaitu hmasate leh tuna hruaitu ni mekte thawhrimna rah a nih thu sawiin huaisen taka mipui dikna chanvo atana beitute inpekna chu a fakawm takzet a ni a ti. Minister chuan MCU pawimawhzia sawiin mipui hrilhhriatna (awareness) kawngah tan la zual sauh sauh turin a chah a. Mipui pawhin an dikna chanvo hrechianga auchhuahpui ngam turin a duh a; chumi kawngah tanho a pawimawh thu a sawi. LPG home delivery kalpui mek chu lawmawm a tih thu sawiin a awlsam zawk mai piah lamah a him zawk thu a sawi a, in kang leh rikrum thilah gas cylinder tam tak kawl ngai tawh lovin insaseng zung zung a awlsam tawh dawn a ni a ti. Khuallian chuan MCU kum 25 tling ta chuan hmasawn lehzualna leh rah tha a chhuah ngei a beisei thu a sawi a ni.

Khualzahawm Pi Ramdinliana, Secretary FCS& CA pawhin thusawiin MCU hruaituten consumerte hmakhua ngaia hun harsa leh khirlh tak tak an lo paltlang thei zel chu lawmawm leh ropui a tih thu a sawi a. Bukna dik hman pawimawh zia sawiin bukna dik piah lamah buk dik a pawimawh thu a sawi bawk

Vawiin MCU Annual General Meeting cum silver jubilee lawmnaah hian Rev. Robawia, Sr. Adviser MCU Hqrs in hunserh a hmang a. Prof Chawngsailova, President MCU Hqrts hnen atangin presidential address ngaihthlak niin Pu A Lalhmangaihzuala Gen.Secy MCU Hqrts in report a pe a ni. Pu Victor Lalawmpuia, Deputy Director, FCS & CA in ‘LPG Online Refill Booking and Home Delivery’ tih thupui hmangin awareness pe in Pu H. Laldikliana Treasurer MCU Hqrs. in lawmthu sawiin hun a khar a ni. Vawiin programma-ah hian MCU hruaitu hmasate chawimawina hun hman a ni bawk.