510/2025-2026

Aizawl dated 8th May 2025: Vawiin chawhnu khan Secretariat Conference Hall-I, MINECO, Aizawlah Consumer-te dikna chanvo humhalhna tur ngaihtuahin, Consumer Protection Council chuan thutkhawmna an nei a. Pu B.Lalchhanzova, Minister, Food, Civil Supplies and Consumer Affairs Department chuan he hun hi kaihruaiin Pu Chhuanthanga, MLA leh Pu K.Hrahmo, MLA ten an telpui a. Pi Teresy Vanlalhruaii, Secretary, FCS & CA chuan thupui hrang hrang lute sawi zauna hun hmangin, Mizoram Consumer Union, Centre for Consumer Education, All Mizoram Farmers' Union, Central YMA, MHIP, Mizoram Merchant Association, Health & Family Welfare, Power & Electricity Department, Law & Judicial department, Transport Department, BSNL leh Legal Metrology-a thawktute an tel a ni.

Hun kaihruaitu Minister Pu B.Lalchhanzova chuan kan zavaiin Consumer kan nih avangin Consumer-te dikna chanvo humhalh leh Consumer te chanvo palzamna thleng tur ven chu kan zavai mawhphurhna a nih thu a sawi a. Consumer Protection kalpui that lohna hmun ah chuan sum hlutna tlakhniamna (Inflation) a thlen nasat phah theih thu a sawi a. Hemi kaihhnawiha dan leh thupek awmte chu ennawn fo a pawimawh thu leh a kenkawh kawngah tanrual a tul thu a sawi. Supply Minister chuan Consumer vek kan nih rualin min dawrtu leh mamawhtute nen indawrtawnna kan nei chang hian hawihhawmna leh biak nuam nih a pawimawh thu sawiin chu chuan harsatna leh buaina tam tak a pumpelh tir theih thu a sawi. Pu B.Lalchhanzova chuan State Consumer Protection Council Meeting chu kum khatah tum hnih tal nei tur a ruahman a tul thu sawiin vawiin thutkhawmna chuan khawtlang leh consumer tan hmasawnna rahbi thar a thlen ngei a beisei thu a sawi bawk a ni.

Vawiin thutkhawmah hian kawtkaia LPG delivery service pek theihna hmun huam zau tir dan turte, Mizofed petrol pump, Treasury Square chhehvel a dan lova petrol zuar thin titawp tur a hmalak dan tur te leh hetiang a dan lova hmun hrang hranga sumdawnna titawp tur a hmalak dan tur sawi a ni. Consumer lungawi lohna chinfel dan sawt zawk a kalpui dan tur te leh Legal Metrology Enforcement thawmthat dan tur te sawi ho a ni a. Private School fee ruahman dan endik te, Public Transport fare endik te, Electric bill chungchanga lungawi lohna thehluh chinfel zung zung a nih theih dan tur te leh State leh District Consumer Protection Council member ruat dan ennawn a ni bawk a ni. Thutkhawm a tarlan danin  Aizawl AMC huam chhunga LPG Distributor 12 zingah Home Delivery Service za a za pe mek Distributor 5 an awm a. District Consumer Commission ah Consumer, lungawi lohna thehlut mi 4710 awm tawhin chung zingah 4630 chu chinfel a ni tawh a. State Commission ah case thehluh 275 a awm bawk a ni.