509/2025-2026

Thenzawl, the 8th May 2025: Vawiin khan Thenzawl AH & Vety Farm ah Chief Minister Pu Lalduhoma chuan NABARD RIDF sum senga din tur Artui tharchhuahna hmunpui lungphum a phum a, Dilpuia Bailey Bridge dawh tur lung phumin Mizo Sial vulh punna hmun a hawng bawk. Pu C. Lalsawivunga, Minister, Prof. Lalnilawma, Minister leh Pu V. Malsawmtluanga, MLA ten an telpui.

Thu a sawinnah Chief Minister chuan, nikum January ni 19 khan Shillong-ah NEC Plenary vawi 71 na ka zu tel a. Mizoramin artui lei nana sum kan sen nasatzia leh tharchhuah ve kan mamawhzia ka zu sawi a.

Mizo mipuiten artui hi kan ei nasa a, kan taksa tan pawh a tha a. Mahse kan thar chhuah ve loh avangin kum tin artui lei nan hian cheng vaibelchhe 22 chuang kan seng thin a, artui tharchhuaktu state lamah kan pawisa hi a liam hnem em em thin. Chuvang chuan, kan mamawh zawng zawng thar theihna farm kan din thei lo a nih pawhin engemaw zat kan lo tharchhuah ve dan tur tal kha dap tha ka ti a ni.

Kan AH & Vety Minister leh official te nen ruahmanna te kan han siam a, a tawi zawngin, Thenzawlah hian Arpui nuaih khat vel vulh theihna, nitin artui singsarih vel tal thar theihna din kan titlu a, sum hi NABARD RIDF atangin Rs 20.64 Cr vel puk kan remti ta a ni. Kan ram mamawh hmalakna, kan rilruin a vei thin bul kan han tan tur hi a phurawm a. Tha taka tihpuitlin kan tum ngei dawn nia, tiin thawktute a chah.

Mizo sial dik tak vulh punna kan han hawng nghal thei hi lawmawm ka ti a. Sial hi a tlatna tur ram nei tha tan chuan ran vulh awlsam, hlawk bawk si a ni a. A vulh theite tan he hmuna a chi tha kan lo tipung hi a hlu hle a ni. Tin, keimahni Mizo sial breed ngei kan lo humhalh pawh kha a tha hrim hrim a. Kan pi leh pute atanga kan rohlu kha an ni hrim hrim a, kan culture-ah hian dinhmun pawimawh tak an luah a ni, a ti bawk.

Pu C. Lalsawivunga, Minister, AH & Vety pawhin thusawiin, Mega Egg Farm chu ram tana ro tling, hmasawnna rahbi pawimawh tur a ni a. Kan sawrkar term hmasa berah hian artuiah tal kan intodelh ve hman tur a ni tih rilru kan pu a, Chief Minister Pu Lalduhoman a lo ngaipawimawh bawk a. A bul kan tan thei dawn ta a ni, a ti.

Prof. Lalnilawma, Minister, RD pawhin thu a sawi a. Ran vulhtute tana an hmalaknaah AH & Vety department a fak a. Sa leh artui te, bawnghnuteah te kan intodelh theih nan department hrang hrang hi tangrual ila, i thawkho ang u, tiin hmalak dan tur tha nia a hriat a tarlang.

Inkhawm hi Dr. Lalrozama, Commissioner & Secretary chuan a kaihruai a, Dr. F. Laltanpuia, Jt. Director, AH & Vety chuan technical report a pe a ni. Artui tharna farm an buatsaih turah hian Arpui nuaih khat awm thei tur leh nitin artui singsarih sang nga vel thar thei tura duan a ni. A thawhna tur fund hi NABARD RIDF Rs. 20.64 Cr dah a ni.

Mizo Sial vulh punna Centre hi Rashtriya Gokul Mission (RGM) 2023-2024 sum Rs. 430.00 lakh senga din a ni a. Civil Works bikah Rs. 253.50 lakh dah a ni.

Contractor hi Architecture Interior Engineering Construction an ni.

Zo Sial te hi inthlahpawlh an tam tawh avangin an pianphung pawh nasa takin a danglam chho va, an fek tawlh tawlh niin a hriat a, Breed Development and Conservation Centre ah hian Zo Sial chi tha, performance tha zawk tharchhuah tum a ni a, semi-intensive a vulh tur a ni. Sial 100 thleng vulh theihna tura ruahman a ni.

Bailey Bridge hi Vety Farm chhunga dil, Dilpui an tih maiin a dil lailia thliarkar a siam kalpawhna tura dawh a ni a. Dil ral leh lama ran chaw chinna hmun kalpawhna a ni nghal bawk. Hna hi NABARD sum Rs. 83 lakh senga sak tur niin lei hi pahnih dawh tum a ni.

Dr R. Zothanmawii, Director, AH & Vety chuan lawmthu sawiin inkhawm a khar a ni.