1295/2023-2024

Kolasib dated 28th July 2023: Tukin khan Pu K Lalrinliana, Minister FCS&CA Department, Kolasib Assembly Constituency bialtu MLA chuan Kolasib Vengthar a Urban Health & Wellness Centre a tlawh a. Dr. RK Lalthlamuana, Chief Medical Officer, CMO a thawktu thenkhat leh khawtlang hruaituten an tawiawm a ni.

Minister Pu K Lalrinliana chuan Sawrkarin mipuite hriselna a ngaih pawimawh thu leh hmalakna pawh nasa tak a kalpui a nih thu a sawi a, Kolasib bial chhung khaw tin ah Health Sub-centre leh SEDP Clinic te din a nih tawh thu a sawi. Tun a Urban Health and Wellness Centre tih puitlin a nih theih nana CMO leh a Staff-te leh Vengthar khawtlang hruaitute inpekna ah lawmthu sawiin veng chhung a dam lo, Damdawi in panna kawng a harsatna hrang hrang neite tan pan awlsam a nih tur thu leh inenkawlna hmun tangkai tak a nih ngei a beisei thu a sawi. Pu K.Lalrinliana chuan Urban Health & Wellness Centre chu a mamawh apiangte tan a thlawn a inentir theih hmun a nih thu leh changtlung zawk a thawmthat zel tur a nih thu sawiin mipui tam zawk dawl zo tur hmunhma tha zawkte pawh khawtlangin an ngaihtuah zel tur thu a sawi a, thawktuten a tul a an hman turin Rs.20000 a hlan bawk a ni.

Dr. RK Lalthlamuana, Chief Medical Officer chuan Urban Health & Wellness Centre ah thawktu Medical Officer pakhat, Staff nurse pakhat, health worker leh 4th grade te an awm a ngaih thu leh thawktu indaihlohna avangin tunah hian Staff nurse leh health worker chauh an la awm theih thu a sawi a. Inentirna record zawng zawng chu Central Sawrkar ah report pek vek a nih tur thu a sawi bawk a ni.

Urban Health & Wellness centre hian a tum ber chu Non-Communicable diseases, natna inkaichhawn theih loh, heng Zunthlum, BP sang, TB, Oral cancer, breast cancer, ENT services leh mental illness natna tam zel tur ven leh tihtlem a ni a. Nu naupai leh naute vaccine hrang hrang pek pawh huam tir tur a ruahman a ni. He centre ah hian inentir man a thlawn a ni ang a, dawmdawi pawh a thlawn vek a pek tur niin health sub centre tin ah leh PHC ah te damdawi a thlawnin an sem chhuak thin bawk ang. Hetiang Urban Health and Wellness Centre hi Mizoram pum ah 17 a awm tawh a, Aizawl district ah 4 leh district tin ah 1 theuh a awm a ni.