1296/2023-2024

28.7.2023: Vawiin ni 28.7.2023(Zirtawpni) hian Govt. Kawlkulh High School chuan an dincham kum 50-na lawmna hun an hmang a, he hun hi HRD Board Vice Chairman Dr. L. Thangmawia chuan hmanpuiin Jubilee Monument a hawng a, Jubilee Souvenir a tlangzarh nghal bawk a ni.

He hunah hian thusawiin Dr. L. Thangmawia chuan Govt. Kawlkulh High School in kum 50 a lo tling ta chu a lawmpui thu leh he sikul din a nih theih nana tha lo thawhtu zawng zawng te, zirtirtu leh thawktu lo ni tawh zawng zawng te leh he sikula zir tawh zawng zawngte a bik takin Jubilee chibai a bukin "Mizoram khaw hrang hranga zirna in hawn a nih theihnan khawtlang nu leh pa ten tha an thawh nasa thin hle a, zirna in te hi khawtlangin private a a din, a hnu lama sawrkarin a lak chhoh tak hi Mizorama zirna in zawng zawng deuh thaw an ni" tiin "kan zirna in sang College tam zawkte pawh chutiang anga din an ni" a ti. Hei hian kan pi leh pu, nu leh pa ten zirna an ngaih pawimawh zia a ti lang a, an tu leh fate ten mahni khua ngeia zirna kan chhunzawm theihnan nasa takin an lo tuar a, vawiina mahni khua ngeia zirna chhunzawm thei ten an chungah lawmna chang kan hriat zel a ngai a ni a ti.

Dr. Thangmawia chuan India ramah National Education Policy thar hman tan mek a ni a, thil thar tam tak a keng tel dawn a, naupang kum 3 atanga sikul luh tan tawh tur a nih thu leh Sports te pawh zirna huangchhung( Curricular) ah telh chhoh a ni tawh dawn a, he policy hlawhtling taka kalpui a nih theih nan Zoram mipuite pawh kan inbuatsaih a ngai hle dawn a ni a ti bawk.

Govt. Kawlkulh High School hi kum 1972 a din niin kum 2022 khan kum 50 a tling a. Harsatna hrang hrang avangin kum 2022 khan a lawmna hun an hmang thei lo a, kumin hian an hmang ta a ni.

Jubilee lawmna hun hi Pu Lalduailova Sailo, VCP Kawlkulh North in a kaihruai a, Rev RK Lalnunmawia'n hunserh hmangin he sikul chhuak mi hlaehtling engemaw zatin an telpui a, Pu Rosiamliana Saiawi, Headmaster, Govt. Kawlkulh High School in lawmthusawiin hun a khar a, tlaiah Jubilee lawmna ruai kilho a ni bawk.